Wratten, Wuddeln oder Woorten (Waarten) sünd lütt Knubbens op de Huud. Dat gifft en ganz Reeg verschedene Typen, de meist all vun so üm un bi 100 verscheden Typen vun Humane Papillomviren utlööst warrt un faken bi’t Anfaten ansteken köönt (Kontaktinfekschoon). De Viren doot sik in de böversten Schichten vun de Huud in de Epithel-Zellen innesten un vermehrt sik in de Zellkerns. Normalerwies sünd se jümmer goodoordig, blot in rore Utnahmfäll sünd se böösoordig.

Wratten op de Huud

Behanneln ännern

Dat gifft verschedene Methoden, Wratten to behanneln. Af un to billt se sik ok alleen wedder trüch, wenn dat Immunsystem de Viren besiegt. Dat is aver nich de Normalfall. Wratten köönt veriest warrn. Dor warrt de böverste Schicht vun de Wratt so deep bi afköhlt, dat de Zellen afstarvt. Mit de Tied, wenn dat en poor Maal maakt worrn is, wasst de Wratt rut un fallt af. Dat geiht aver blot bi Wratten good, de op de Huud opsitt. Bi Wratten, de deper ringaht, geiht dat nich good.

Wratten, de deper ringaht, köönt in en Operation rutsneden warrn. Dat is aver ok nich eenfach, denn dat is faken mit Wehdaag verbunnen, een kann licht veel Blood verleren, wenn de Wratt deep sitt un faken gifft dat Narven.

In’n Volksgloven gifft dat ok noch dat Böten (Bespreken) as Oort Wratten to behanneln. Medizinsch is aver natürlich nich nawiest dat dat ok würklich helpt.

Vörsorg ännern

Siet 2006 gifft dat för de Genitalwratten en Empstoff, den HPV-Empstoff, de Froonslüüd teemlich goot vör disse Soort Wratten bewohrt. För annere Soorten vun Wratten gifft dat aver noch nix. Dor helpt blot vörsichtig wesen. To’n Bispeel barft lopen in’t Swemmbad is nich good, dor kann’n sik licht mit Wratten ansteken.