Wikipedia

For Your Eyes Only (Film)

Filmdaten
Plattdüütsch Titel: —
Originaltitel: For Your Eyes Only
Düütsch Titel: In tödlicher Mission
Produkschoonsland: Grootbritannien
Johr vun’t Rutkamen: 1981
Läng: 127 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: John Glen
Dreihbook: Richard Maibaum
Michael G. Wilson
Produkschoon: Albert R. Broccoli
Musik: Bill Conti
Sheena Easton (Titelleed)
Kamera: Alan Hume
Snitt: John Grover
Szenenbild: John Fenner
Kledaasch: Elizabeth Waller
Dorstellers

For Your Eyes Only (op plattdüütsch so veel as „Blots för dien Ogen“; dt. Titel: In tödlicher Mission) is de Titel vun den twölften James-Bond-Film ut de Reeg vun Eon Productions Ltd. Roger Moore speelt dorin to’n föfften mol den britischen Geheemagent, man to’n eersten mol ünner Speelbaas John Glen. De Premiere weer an’n 24. Juni 1981 in London. In Düütschland weer de Film an’n 7. August 1981 to’n eersten mol in de Kinos to sehn. Bi dissen Film geev dat to’n eersten mol keen Roman as Vörlaag. Dat Dreihjbook baseert op twee Kortgeschichten vun Ian Fleming ut den sien Sammlung For Your Eyes Only.

Inholt ännern

In de tyypsche Ingangsszeen warrt Bond an’t Graff vun sien Ehfro Tracy wiest, de an’t Enn vun On Her Majesty’s Secret Service vun een Liddmaatsche vun Blofeld sien Verbrekerorganisatschoon doodschaten worrn is. Dör en verkehrte Naricht lockt Blofeld em in en feernlenkten Heevschruver üm em endlich an de Siet to maken. Bond kriggt aver de Kontroll över den Heevschruver un wennt dat Blatt. Opletzt kriggt he Blofeld tofaten un maakt em dood. Dormit is de olle Geschicht üm Blofeld to Enn bröcht worrn, de in ut de fröhen Filmen noch apen bleven weer.

Dorna kriggt Bond den Opdrag, en ATAC-Reedschop (Automatic Targeting Attack Communicator, en Stüerreekner för den Start vun Atomraketen) weddertofinnen. Dat ATAC weer an Boord vun en tarnt Schipp vun de Royal Navy, dat in de Ionischen See versenkt worrn is. Vör em hett al de Archäoloog Havelock för den britischen geheemdeenst na dat Instrument söcht, is aver tosamen mit sien Fro vun den Verbreker Hector Gonzalez ümbröcht worrn.

Bond maakt sik op de Söök na den Killer, üm en Spoor to finnen, wokeen achter den Moord steken deit. Man, noch vördem Bond Gonzalez tofaten kriggt, warrt de vun Melina, de Dochter vun den Archäoloog Havelock, mit en Armborst ümbröcht, vunwegen dat se den Dood vun ehr Öllern torüchbetahlen will. Beide tosamen neiht ut un warrt vun de Verbrekerbande verfolgt. In de Datenbank vun’n MI6 finnt Q Henwiesen op den Opdraggever. De Spoor föhrt eerstmol na Cortina d’Ampezzo, woneem he Kristatos, en greekschen Reeder drapen deit, de wieterhülpen schall. Kristatos föhrt em op de Spoor vun den bekannten Smuggler Columbo in Grekenland, de vörgeevlich achter den Moord steken schall. Ok Melina is na Cortina lockt worrn, woneem dat twee Motorrad-Föhrers op ehr afsehn hebbt. Bond kann ehr schulen, schickt ehr aver na Huus, vunwegen dat se sik nich in Gefohr begeven schall. Wedder kummt dat to en Verfolgungsjagd – ditmol dör den Snee vun de Bargen.

Op Korfu stellt sich rut, dat Kristatos en verkehrte Spoor leggt hett. Columbo övertüügt em, dat Kristatos sülvst de Lege achter de Moorden is. He wiest em Kristatos sien Lager in Albanien, woneem he Drogen un Wapen hett. Ok en Dukerutrüsten för grote Depen finnt he dor för. Mit Melinas Hülp kann Bond dat vermisste ATAC ut dat Wrack ruthalen. Man, torüch an Boord töövt al Kristatos op em, üm em dat Instrument glieks wedder aftonehmen. Melina un Bond will he an de Siet maken, dat keen Tügen över blieft, man de beiden künnt sik redden.

Tosamen mit Columbo, de Kristatos sien Versteek in en ehmolig Klooster kennt, un eenige vun sien Lüüd wüllt sik de beidne dat ATAC torüchhalen. Dat stellt sik as bannig swoor rut, vunwegen dat dat Klooster op’n Tipp vun en piele Felswand liggt. Bond mutt an de Wand hoochkladdern, üm vun baven den Optog to bedenen. Baven in’t Klooster kummt dat to’n Showdown. Bond beobacht, dat de russ’sche General Gogol vun’n KGB op’n Barg lannt, de vun Kristatos dat ATAC köpen will. Opletzt kann Bond de Reedschop tonichten maken, Kristatos warrt vun Columbo doodmaakt, as de Bond doodmaken will.

Kritik ännern

  • Roger Ebert meen, dat weer en souveränen Bond-Film, de handwarklich goot maakt weer. He kritiseer aver, dat de Film to gewöhnlich weer.[1]
  • Vincent Canby schreev in de New York Times vun go’e Ünnerholen, ok wenn he den Film nich as den Betsen ut de Reeg ansehn de.[2]
  • Variety loov dorgegen bi’t Rutkamen vun den Film, dat dat ahn Inschränken een vun de ünenerhollnsten vun de twölf Bond-Filmen bit dorhen weer.[3]

Utteken ännern

De Film weer för tosamen söss Filmpriesen vörslahn, dorünner ok eenmol för den Oscar in de Kategorie Best Leed. Wunnen hett de Film opletzt twee Priesen:

  • 1982: de Golden Lienwand
  • 1991: den ASCAP Award in de Kategorie Most Performed Feature Film Standards för Bill Conti un sien Leed „For Your Eyes Only“

Produkschoon ännern

Ofschoonst de Vörgängerfilm Moonraker kommerziellen en groten Spood weer, geev dat ok veel Kritik an dat Övermaat vun technischen Speelkraam[4]. Michael G. Wilson, de intwüschen to’n Utföhren Produzenten opstegen weer, fünn, dat sik Bond wedder mehr op sien egen Person verlaten künnen un nich so afhangig vun de Technik wesen schüll[4]. De Produzenten menen, dat de Dreihböker vun Christopher Wood to wenig Energie un binnere Logik harrn[5] un hebbt dorüm den fröheren Dreihbookschriever Richard Maibaum wedder torüch halt, üm tosamen mit Wilson dat Dreihbook to schrieven.

De Titel un en poor vun de Figuren weern ut Fleming sien Kortgeschichten övernahmen. De Ingangsszeen is schreven worrn, üm en mööglichen ne’en Bond-Dorsteller intoföhren un em mit fröhere Elementen ut de Filmreeg to verbinnen. Dorbi warrt ok de olle Feendschop mit Blofeld to Enn bröcht, ofschoonst de Figur in’n Vörspann narms offiziell so nöömt weer. Dat leeg doran, dat de Rechtslaag to de Tiet nich kloor weer[4]. Dat weer dat eerste mol, dat en Bond-Film nich op Grundlaag vun en Roman entstahn is, man op en Kortgeschicht baseert.

 
Dat Meteora-Klooster Agía Triáda weer een vun de Dreihöörd in den Film.

As Maibaum un Wilson an dat Dreihbook arbeit hett, stünn noch nich fast, dat Moore noch mol wedder de Rull vun James Bond spelen de. He harr in’n Juli 1980 bi en Pressekunferenz ankünnigt, nich noch eenmol Bond spelen to wullen, so dat de Makers sik na möögliche ne’e Dorstellers ümkeken hebbt. In’n September 1980 künn man Moore denn aver övertügen, de Rull doch noch mol wedder to övernehmen. As Bondgirl is Carole Bouquet nahmen worrn, de bi Moonraker al vörsproken harr[4]. As in de fröheren Filmen hebbt Lois Maxwell un Desmond Llewelyn wedder jemehr wennte Rullen as Miss Monneypenny un Q speelt. Ok Bernard Lee weer wedder as M vörsehn, is aver swoor krank worrn un künn nich mehr spelen. Sien Rull is liekers nich nee besett worrn, man sien Test weer op annere Figuren opdeelt.

De Dreiharbeiten füngen an’n 15. September 1980 an un güngen bit to’n 13. Februar 1981[6]. Wiel de Arbeiten geev dat en sworen Unfall: In Cortina is de Szeen dreiht worrn, bi de Bond op Ski vör Lüüd op Motorrööd weglopen deit. En Rennsleden is bi de Szeen ut de Bahn utbroken un dorbi is de 23 johrige Stuntman Paolo Rigon, de an’t Stüer seet, ümkamen[7].

Dreiht worrn is vör allen in Grekenland op dat ionische Eiland Korfu un op dat Fastland, as to’n Bispeel bi de Kloosters vun Meteora, woneem de Kladderszeen opnahmen weer. In Cortina d’Ampezzo in de Dolomiten sünd de Ski-Szenen entstahn, wiel de Ingangsszeen in London in’t Rebeet vun de Themse dreiht worrn is. De Szenen op dat Forschungsschipp vun Melina ehr Öllern sünd in de Bucht vun Kalami an de Oostküst vun Korfu entstahn.

For Your Eyes Only is mit en Budget vun üm un bi 28 Mio. US-Dollar produzeert worrn.[8] Kommerziell harr de Film Spood un speel weltwiet ruchweg 195 Mio. US-Dollar in[8].

Literatur ännern

Borns ännern

  1. ↑ Filmkritik vun Roger Ebert vun’n 1. Januar 1981 afropen an’n 12. März 2013 (engelsch)
  2. ↑ Filmkritik vun Vincent Canby in de New York Times]] vun’n 26. Juni 1981; afropen an’n 12. März 2013 (engelsch)
  3. ↑ Time Tunnel: Review Rewind, op: mi6-hq.com, afropen an’n 12. März 2013 (engelsch)
  4. ↑ a b c d Production Notes – For Your Eyes Only op mi6-hq.com (engelsch), afropen an’n 2. Dezember 2012
  5. ↑ Steve Rubin, Siegfried Tesche: Die Hintergrund-Story zu 25 Jahre Bond. Kino Verlag, Hamborg 1987, ISBN 3-89324-026-8, S. 171.
  6. ↑ Steve Rubin, Siegfried Tesche: Die Hintergrund-Story zu 25 Jahre Bond. Kino Verlag, Hamborg 1987, ISBN 3-89324-026-8, S. 175.
  7. ↑ Steve Rubin, Siegfried Tesche: Die Hintergrund-Story zu 25 Jahre Bond. Kino Verlag, Hamborg 1987, ISBN 3-89324-026-8, S. 158-170.
  8. ↑ a b Box office / business för For Your Eyes Only. Op: imdb.de; afropen an’n 12. März 2013.

Weblenken ännern

James-Bond-Filmreeg

Filmreeg vun Eon
1962: Dr. No | 1963: From Russia with Love | 1964: Goldfinger | 1965: Thunderball | 1967: You Only Live Twice | 1969: On Her Majesty’s Secret Service | 1971: Diamonds Are Forever | 1973: Live and Let Die | 1974: The Man with the Golden Gun | 1977: The Spy Who Loved Me | 1979: Moonraker | 1981: For Your Eyes Only | 1983: Octopussy | 1985: A View to a Kill | 1987: The Living Daylights | 1989: Licence to Kill | 1995: GoldenEye | 1997: Tomorrow Never Dies | 1999: The World Is Not Enough | 2002: Die Another Day | 2006: Casino Royale | 2008: Quantum of Solace | 2012: Skyfall | 2015: Spectre

Annere
1954: Casino Royale (Feernsehfilm) | 1967: Casino Royale | 1983: Never Say Never Again

 
Vun „https://nds.wikipedia.org/w/index.php?title=For_Your_Eyes_Only_(Film)&oldid=924883“