9/11 (2002)

9/11 (dt. Titel: 11. September – die letzten Stunden im World Trade Center) is de Titel vun en franzöösch-amerikaanschen Dokumentarfilm vun de Naudet-Bröder ut dat Johr 2002. De Film dokumenteert den Afloop vun de Terroranslääg vun’n 11. September 2001 op dat World Trade Center in New York City.

Filmdaten
Originaltitel:	9/11
Düütsch Titel:	11. September – Die letzten Stunden im World Trade Center
Produkschoonsland:	USA, Frankriek
Johr vun’t Rutkamen:	2002
Läng:	112 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	James Hanlon Rob Klug Gédéon Naudet Jules Naudet
Dreihbook:	Tom Foreman Greg Kandra
Produkschoon:	David Friend u. a.
Musik:	Richard Fiocca Michael S. Patterson
Kamera:	Gédéon Naudet Jules Naudet James Hanlon
Snitt:	Richard Barber u. a.

Dat Tostannenkamen vun den Film is en Tofall wesen: De Bröder Jules un Gédéon Naudet harrn sik 2001 vör en längere Tiet op en Wacht vun de Füerwehr in New York inquarteert, vun wegen dat se en Dokumentatschoon över en Füerwehrmann wiel sien Utbilln dreihn wulln. De Wacht weer 100 Duane Street, de nich wiet weg leeg vun’t World Trade Center. Bi jemehr Filmarbeit sünd se mit de Mannschop vun’n de Dreihledder 1 (Ladder 1), to de ok de junge Füerwehrmann in Utbilln hören de, op jemehr Insatzfohrten föhrt. Dorbi sünd de beiden in de Reddensakschoon ründ üm den Anslag un dat Instörten vun dat Bowark mitrinrutscht, wobi Jules mit in dat Trade Center ringahn weer un so de eenzigen Biller filmt hett, de vun binnen den Toorn 1 wiel de Katastrooph maakt worrn sünd.

Inholt

De Film wiest de Aflöp, as de Naudet-Bröder se dormols mit jemehr Handkamera optekent hebbt. Twüschenschalt sünd Intervies mit Bedeeligte Füerwehrlüüd, de jemehr Sichtwies to de Vörgäng vertellt.

De eersten Minuuten vun den Film wiest Szenen ut den Alldag op de Füerwacht. Dorbi warrt Insichten vermiddelt, woans de Utbilln to en Füerwehrmann aflopen deit, wat de Arbeit vun de Füerwehr is un woans dat Leven in en Führwacht aflopen deit. De Kameraadschop ünner de Lüüd warrt mit en hogen Stedenweert dorstellt. Bito warrt de Hööftdorsteller vun de plaante Dokumentatshoon vörstellt, de Rekrut Tony Benetados.

An’n 11. September 2001 föhrt Jules morgens mit den Löschtog rut as ’n vermeentlichen Gasalarm geven weer. De Insatz finnt in de Neeg vun’t World Trade Center (WTC) statt un Jules maakt Opnahmen vun de Routine-Arbeit vun de Füerwehr. As midden in Manhatten op eenmol luut de Larm vun en Fleger to hören is, schwenkt Jules mit de Kamera hooch un filmt dorbi dör Tofall den Inslag vun den eersten Fleger, en Boing 767, de hooch in de Fassaad vun’n Noordtoorn vun’t WTC opdröpt. Disse Opnahm gell lange Tiet as de eenzige vun den eersten Inslag.

De Löschtog Ladder 1 föhrt dorophen foorst wieter na de Unglücksteed un is de eerste, de in’t WTC ankamen deit. As Jules anhollen weer, bi’n Insatzleider to blieven, filmt he in de wieteren Tiet, de in de Lobby vun’n Noordtoorn, wo na un na jümmer mehr Füerwehren indrappt un de Insatzföhrers versöökt, ünner de technischen Problemen mit de Fohrstöhl un den Funkverkehr un de sünneren Ümstännen vun dat Hoochhuus de Reddensakschoon to koordineeren. Vele Füerwehrlüüd sünd to sehn, de sik to Foot op’n Weg na baven maakt, wo dat Füer is. Vele vun jem hebbt den Dag nich överleevt. An de Gesichter is düütlich to marken, wo groot de Sorgen sünners bi de verantwoortlichen Insatzleiders sünd.

Stoffwulk na’t Instörten vun’n tweeten Toorn

Gédéon Naudet hett sik wiel den eersten Inslag op de Füerwacht ophollen un dör de Pressemedien höört, wat passeert weer. Ut Sorg üm sien Broder maakt he sik mit en tweete Kamera to Foot op’n Weg na de Insatzsteed. Dör en Tofall maakt he dorbi en Opnahm vun den tweeten Fleger, de vun de Siet her in den Süüdtoorn vun dat WTC insleiht. Op sien Opnahmen hollt he de Trümmer fast, de sik över dat Veerdeel üm dat World Trade Center verdeelt hebbt, aver jüst so ok de verschreckten Gesichter vun all de Lüüd op de Straten, de nich faten künnt, wat vör sik gahn deit. De tweete Inslag warrt ok dör de Opnahmen vun Jules Naudet dokumenteert, de to de Tiet jümmer noch in de Lobby vun’n Noordtoorn weer. De Insatzkräft harrn vun den egentlichen Inslag vun den Fleger nix mitkregen un wüssen gor nich to düden, woneem de Trümmer herkemen, de vun baven rünnerkamen deen. Kort later weer kloor, dat ok de Süüdtoorn drapen weer, wat den Insatz noch sworer maken de, vun wegen dat en tweete Reddensakschoon organiseert warrn müss.

De Kamera vun Jules hett later de Reakschonen vun de Insatzkräft op dat Instörten vun den Süüdtoorn opnahmen. De Larm vun’n tohopenfallen Toorn is kuum uttohollen un lett de Lüüd in’n Noordtoorn Rietut nehmen. Denn warrt allns düster un de Ruum füllt sik op’n Slag mit fienen witten Stoff. Mit de Lamp vun de Kamera versöcht Jules to helpen un filmt dorbi dör Tofall, woans de Füerwherlüüd versöökt, den doden Kaplan Mychal Judge to bargen. Na un na warrt de Sicht beter un de inslaten Füerwehrlüüd söökt nu na’n Utweg ut den Noordtoorn, wat dör de slecht Sicht un de Gefahr dör rünnerfallen Minschen un Trümmer nich eenfach is. Insatzleider Pfeiffer vun Ladder 1 gifft foorts ok Anwiesen an sien Lüüd, den Toorn so gau as mööglich to evakueeren. Korte Tiet nadem Jules mit den Insatzleider un annere ut dat Bowark rutkamen sünd, stört ok de Noordtoorn in sik tohopen. To’n tweeten mol warrt dat düster üm Jules un de fiene witte Stoff maakt sik överall breed.

Gédéon müss in de Twüschentiet wedder ümdreihn, vun wegen dat de Polizei em nich bit an de Unglückssteed vörlaten hett. Em warrt kloor, dat he sien Broder villicht nich wedder sehn deit, as he wedder na de Wacht torüch geiht. Dor drapt na un na de Füerwehrlüüd wedder in, de kuum faten künnt, dat se lebenning dorvun kamen sünd. Ok Jules kammt opletzt wedder torüch. Dat stellt sik rut, dat wohrhaftig all Füerwehrlüüd vun de Wacht in de Duane Street de Katastrooph överleevt hebbt. Eenzig de Füerwehrrekrut Benetados, över den de Film toeerst gahn schüll, blifft eenige Tiet verschollen, kumm topletzt aver ok wedder torüch. He harr Order, in de Füerwacht to blieven, weer aver mit en ollen Kummandanten in Rohstand denn doch na de Insatzsteed lopen, üm na sien Kameraden to söken.

De Trümmer vun’t World Trade Center

De letzte Deel vun de Dokumentatschoon wiest dat Chaos an de Unglückssteed, de in de Twüschentiet de Beteken Ground Zero kregen hett, un dat Möhen vun de Füerwehrlüüd, in de Trümmer na Lüüd to söken, de den Anslag överleevt hebbt. Man vun de ruchweg 3.000 Doden, de de Anslag köst hett, is wegen de Wucht mit de de Masse vun dat hele Hoochhuus tohopenfallen is tomeist nich veel nableven. Funnen warrt na eenige Daag blots noch Dode – dorünner 343 Füerwehrlüüd.

Utteken

De Dokumentatschoon is in de USA vör fief Emmys nomineert wesen un hett dorvun twee wunnen – blangen veer annere Priesen, mit den de Film uttekent worrn is:

• 2002: Emmy in de Kategorie Rutragen nich-fiktive Produkschoon (Informatschoon)
• 2002: Emmy in de Kategorie Rutragen Toonmischen bi en nich-fiktive Produkschoon
• 2002: Düütsch Feernsehpries in de Kategorie Best Internatschonal Programm
• 2003: Special Humanitarian DVD Award vun de Satellite Awards
• 2003: WGA Award (Feernsehn) in de Kategorie Dokumentarfilm – aktuelle Begeevnissen
• 2003: Peabody Award

Medien

De Film is as Feernsehfilm produzeert worrn, keem later aver ok as DVD rut. De Videofaten vun den Film bargt tosätzlich to de reine Filmdokumentatschoon tosätzlich Material un Interviews mit un över de Füerwehrlüüd, de vun de Begeevnissen bedrapen weern, as ok Intervies mit de Naudet-Bröder sülvst.

Bi de Eerstutstrahlen in’t US-amerikaansche Feernsehn an’n 11. März 2002, harr de Film 40 bit 50 Millionen Tokiekers, also ruchweg en Drüddel vun all Feernsehkiekers in de USA. De US-amerikaansche Feernsehfaten is ruchweg 30 Minuuten länger as de düütsche DVD-Faten un warrt vun Robert De Niro as Kommentater präsenteert.

In Düütschland weer de Eerstutstrahlen an’n 11. September 2002, den eersten Johrsdag vun de Terroranslääg in de ARD.

To’n föfften Johrsdag hebbt de Naudet-Bröder en wietere Dokumentatschoon dreiht, in de se versöken, de Füerwehrlüüd vun dormols wedder to finnen un to kieken, wat ut jem worrn is.

Weblenken

• 9/11 (2002) in de Internet Movie Database (engelsch)
• Artikel över de Bröder Naudet un den Film bi Stern.de vun’n 4. September 2006