A Man Called Horse (Film)
A Man Called Horse (op plattdüütsch so veel as „En Mann, de Peerd nöömt warrt“; dt. Titel: Der Mann, den sie Pferd nannten, op DVD as Ein Mann, den sie Pferd nannten) is de Titel vun en US-amerikaanschen Western, de 1970 in de Kinos keem. De Film warrt as de eerste realistische Indianerfilm ansehn.
| Filmdaten | |
|---|---|
| Plattdüütsch Titel: | — |
| Originaltitel: | A Man Called Horse |
| Düütsch Titel: | Der Mann, den sie Pferd nannten |
| Produkschoonsland: | USA |
| Johr vun’t Rutkamen: | 1970 |
| Läng: | 111 Minuten |
| Originalspraak: | Engelsch Sioux |
| Öllersfreegaav in Düütschland: | FSK 12 |
| Filmkru | |
| Speelbaas: | Elliot Silverstein |
| Dreihbook: | Jack DeWitt Dorothy M. Johnson |
| Produkschoon: | Sandy Howard |
| Musik: | Lloyd One Star Leonard Rosenman |
| Kamera: | Robert B. Hauser Gabriel Torres |
| Snitt: | Philip W. Anderson Michael Kahn |
| Dorstellers | |
| |
Speelbaas vun den Film weer Elliot Silverstein, de Hööftrull hett Richard Harris speelt. Dat Dreihbook hett Jack DeWitt schreven un baseert op en Vertellsel vun Dorothy M. Johnson, dat se 1968 ünner glieken Naam in ehr Book Indian Country publizeert harr.
Dat geev later noch twee wietere Filmen, de op dissen Film opboet: The Return of a Man Called Horse (1976) un Triumphs of a Man Called Horse (1982). Richard Harris hett ok wedder in beide Filmen de Hööftrull speelt.
Inholt
ännernDe rieke engelsche Lord John Morgan is na Amerika reist, üm dor to jagen un sik dat Land to bekieken. Een Dag warrt sien Lager vun de Lakota-Sioux överfallen, as he jüst in’n Stroom baden deit. Sien Begleiders, de em dör de Wildnis föhrt hebbt, warrt korterhand afmurkst, wiel Morgan sülvst – naakt, as he is – fangen nahmen warrt. De Indianers behannelt em as’n Slaav oder eher noch as’n Huusdeert un sleept em mit in dat Indianerlager, vun wegen dat he nu dat Egendom vun Buffalo Cow Head warrt, de Mudder vun’n Hööftling. De Indianers geevt em den Naam Peerd.
In dat Lager dröpt he op en annern Fangenen, Batise, de vun de Indianers verstümmelt worrn is, as he versöcht hett wegtolopen. Bi de Indianers warrt Batise as en Oort Hoffnarr hollen. He bringt Morgan de Spraak vun de Indianers bi un lehrt em ok jemehr Brüük un Levenswies. Ok Morgan versöcht eenmol, ut dat Lager uttoneihn, man denn mutt he faststellen, dat sien eenzige Chance is, sik an dat Leven un de Levenswies vun de Indianers antopassen.
Mit de Tiet finnt he sik jümmer beter torecht un identifizeert he sik ok jümmer mehr mit de Indianers. Langsom fangt he an, jemehr Levenswies to begriepen, de he toeerst as wild un unminschlich ansehn hett. As de Indianers vun en annern Stamm angrepen warrt, maakt he twee vun de Kriegers an de Siet, worophen he sülvst in den Stand vun en Krieger opstiegen deit. Morgan mutt nu dat pienfulle Ritual vun’n Sünnendanz dörlopen, üm in den Stamm opnahmen towarrn kann un heiraat dorna de Süster vun den Hööftling, Running Deer.
Bi en wieteren Angreep dör Shoshone, kamt aver de Hööftling Yellow Hand as ok Running Deer, de vun Morgan swanger is, üm’t Leven. Morgan kann den Angreep torüchslahn un nimmt dorna Buffalo Cow Head as Mudder an, vun wegen dat ehr as olle Fro, de nich sülvst för sik sorgen kann, anners drauht verbannt to warrn. Eerst as se Johren later dood blifft, reist he torüch na England.
Kritiken
ännernLexikon vun’n internatschonalen Film: Ein Abenteuerfilm, der den Ureinwohnern Nordamerikas ungewöhnlich viel Aufmerksamkeit entgegenbringt, dem freilich die Verquickung von volkskundlicher Rekonstruktion und spannender Unterhaltung nicht ganz gelingt.[1]
Phil Hardy nööm den Film en „macho-masochistischen Western“, de mit dat dorstellte Initiatschoonsritus „dat Liedenvermögen vun de Tokiekers jüst so as ok dat vun Harris“ strapazeert.[2]
Utteken
ännernDe Film weer 1971 för dree Filmpriesen vörslahn. Ehrt worrn is he mit den Bronze Wrangler vun de Western Heritage Awards.
Anners wat
ännern- De Film is bi de Rosebud Sioux ut Süüd-Dakota dreiht worrn un bruukt deelwies ok de Sioux-Spraak. Joe Hembus hett dorop henwiest, dat indiaansche Kritikers tallrieke verkehrte Dorstellen vun de Sioux-Kultur nawiest hebbt. Vör allen weer dat Tüdelkraam, dat de Sioux jemehr ollen Stammliddmaten verbannen deen un de denn sehn müssen, dat se alleen kloor kamt.[3]
- De düütsche Punk-Grupp Die Ärzte hett in Anspelen op den Film en DVD rutbröcht mit den Titel „Die Ärzte – Die Band, die sie Pferd nannten“.
Literatur
ännern- Dorothy M. Johnson: Sein Name war Pferd (Originaltitel: A Man Called Horse). In: Der Mann, der zu viel sprach. Geschichten aus dem Wilden Westen. dtv, München 1967
Borns
ännern- ↑ Filmkritik to den Film vun Lexikon vun’n internatschonalen Film
- ↑ Phil Hardy: The Encyclopedia of Western Movies. Woodbury Press Minneapolis 1984. ISBN 0-8300-0405-X. S.326
- ↑ Joe Hembus: Western-Lexikon - 1272 Filme von 1894-1975. Carl Hanser Verlag München Wien 2. Auflage 1977. ISBN 3-446-12189-7. S.154
Weblenken
ännern- A Man Called Horse in de Internet Movie Database (engelsch)
- Kritiken to den Film op Rotten Tomatoes