Abe Lenstra
Abe Lenstra (* 27. November 1920 in Heerenveen; † 2. September 1985 in Heerenveen), ok ús Abe nömmt, is de grode Football-Legend ut de Provinz Freesland in de Nedderlannen. Sien Vadder weer de Hannelsmann un Höker Mindert Jans Lenstra un sien Mudder weer Janke Suierveld.
As he 16 Johr oolt weer, maak he sien eerst Speel för VV Heerenveen. Ut düssen Vereen is later de SC It Hearrenfean wurrn. Mit 19 Johren speel he dat eerste Mol för de nedderlannsche Natschonal-Mannschup. Alltohopen hett he dor denn 47 Mol för speelt. Dor hett he 33 Doren bi schaten, just so veel as Johan Cruyff, de 48 Mol mitspeelt hett.
As he 14 Johr oolt weer, kreeg he en Anfraag, ob he nich in England för Huddersfield spelen müch, man sien Vadder wull dat nich hebben. Later hett he ok noch Anbotten ut Italien un Düütschland kregen, he scholl dor man Football to sien Beroop maken. Man he hett aflehnt, vunwegen dat he nich Slaav vun en Vereen weern wull. As denn de Beroopsfootball in de Nedderlannen inföhrt wurrn is, hett he as „Halfprofi“ bit 1964 bi den Sportclub Enschede mitspeelt. Dat weer de latere FC Twente.
An'n 7. Mai 1950 speel Lenstra mit in dat histoorsche Speel vun It Heerenveen gegen Ajax Amsterdam. Dat duur noch nich en halve Stünn, dor lä Heerenveen mit 1:5 achtern. Abe Lenstra hett groden Andeel harrt an de fiev Doren, de Heerenveen in de Rest vun dat Speel noch maakt hett. An Enn’ stünn dat 6:5 för Heerenveen un dat hett dor sien Rull bi speelt, dat Ajax in düt Johr nich nedderlannsche Meester wurrn is.
1951 un 1952 is he in de Nedderlannen to’n „Sportsmann vun dat Johr“ wählt wurrn.
Dat nee Stadion vun den SC It Heerenveen, de in de nedderlannsche Eerste Liga mitspeelt, hett 1995 den Naam „Abe-Lenstra-Stadion“ kregen. En Standbild vun em steiht dor bi’n Hööftingang. 1995 is in düt Stadion en Musical öber sien Leven upföhrt wurrn.
Literatur
ännern- Yme Kuiper, 'Abe Lenstra (1920-1985). Van Us Abe tot nationaal idool,' in: Fryslân, Nieuwsblad voor geschiedenis en cultuur, Jg. 6 (2000), Nr. 2, Siet 50-53. gifft dat Online