Aberfeldy (Brenneree)

Aberfeldy is en Whiskybrenneree in Aberfeldy, Perthshire, Schottland. De Brennereebowarken sünd in de schottischen Denkmollisten in de Kategorie B inordent.

Aberfeldy
Brenneree Aberfeldy
Land	Schottland
Region	Highlands
Tyyp	Malt
Status	aktiv
Besitter	Bacardi
Grünnt	1896
Grünner	John un Tommy Dewar
Architekt	Charles Chree Doig
Waterborn	Pitilie Burn
Washstill(s)	2 × 17.000 l
Spiritstill(s)	2 × 14.000 l
Produkschoonsvolumen	2.100.000 l
Websteed	www.dewars.com

Historie

De Brenneree an’n Rand vun’n Oort mit glieken Naam is in’t Johr 1896 vun de Bröder John un Tommy Dewar an’t Över vun den Tay grünnt worrn, op dat Rebeet vun de ehmolige Destille Pitilie, de an de glieken Steed twüschen 1827 un 1867 vun Alexander McLean bedreven worrn is. De Produkschoon is 1898 anlopen. Twüschen 1917 un 1919 is de Destille nich in Bedrief. 1925 is de BRenneree an de Distillers Company Limited (DCL) verköfft worrn un keem so 1930 an de Scottish Malt Distillers (SMD). De egene Molteree weer 1972 dicht maakt, as to Tiet in vele annere Brennereen ok. De Tall vun de Brennblasen is denn op veer verdubbelt worrn. 1998 hett Bacardi de Brenneree Aberfeldy tosamen mit dree annere Destillen ut den Bestand vun DCL övernahmen.

Gäärfatten vun Aberfeldy

Produkschooon

Aberfeldy tellt to dat schottische Whiskyrebeet Highlands. Dat Water för de Produkschoon warrt ut den Pitilie Burn betogen. In de Brenneree gifft dat en Meeschfatt (mash tun) vun 6,8 t ut Eddelstahl un acht Gäärfatten (wash backs) to 34.000 l ut Holt vun Sibirische Lärken. Brennt warrt de Whisky in twee wash stills to 17.000 l un twee spirit stills to 14.000 l, de mit Damp hitt maakt warrt.

De Destille is egens to den Sinn boet worrn, Whisky för Blends to produzeren, de to de Tiet jümmer mehr in’t Kamen weern. So ist de produzeerte Whisky lange Tiet alleen för den Blend-Versnitt bruukt worrn. Ok hüüt warrt noch de gröttste Deel vun de Produkschoon för den huusegenen Dewar’s verbruukt, de in de USA de meistverköffte schottische Blended Whisky is. Mit de Övernahm vun de Destille dör Bacardi is de Palette vun Produkten düütlich breder worrn, un so warrt vundaag ok en Andeel as Single-Malt-Whisky op’n Markt anboden.

Kiek ok

• List vun de schottischen Brennereen

Literatur

• Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
• Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Weblenken

Edradour. Mehr Biller, Videos oder Audiodateien to’t Thema gifft dat bi Wikimedia Commons.

• The Definitive Scotch Whisky Information Website (engelsch)