Eilke

Eilke (ok Elleke, Ailke un Eilka) is en plattdüütschen Vörnaam för Jungs un Deerns.

Herkamen

De Naam kümmt vun den germaanschen Vörnaams mit de Vörsül Eil- vun her (Eilhard bi Jungs, Eilborg . Noch öllere Formen sünd Eigilhard oder Egilhard. Dor steekt de beiden Wöör Egil (dat heet Sweert) un harti (dat heet hart oder stark) in. De Naams Egilhard un Eilhard bedüüt all overeen: De mit dat Sweert stark is. Eilborg kann ok vun dat germaansche Woort Agi- (Schreck) herkamen (Schreck-borg) oder vun Adel- (vörnehmen Sinn). So ganz genau kann een dat woll hüdigendags nich mehr seggen.

De plattdüütsche Naam

De ole Naam mit siene twee Sülven is tohopentrocken wurrn to ene korte Form. Dor is denn mit de Tiet Ehler oder Eilert rutkamen. Mit de Tiet sünd düsse Naams noch wieter afslepen wurrn. Denn stünnen dor de korten Naams Eile un Elle. As dor en Smusenaam för lüttje Göörn (oder en Vadernaam) vun maakt weern scholl, is dor dat Anbacksel to'n lüttjer maken -ke achtern anbackt wurrn. So sünd de Naams Eileke un Elleke tostanne kamen. Bi Eileke is denn ok noch dat e verslaken wurrn. So bleev dor man Eilke över.

Kiek ok bi

• List vun plattdüütsche Vörnaams

Weblenken

• Wofaken un woneem de Vörnaam in Düütschland vörkummt: Eilke, Ailke, Eilka, Elleke

De Artikel „Eilke“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.