Hauptmenü öffnen
Alan Bean - offizielle NASA-Foto

Alan LaVern Bean (* 15. März 1932 in Wheeler, Texas; † 26. Mai 2018 in Houston, Texas) weer en ehmalger US-amerikaansch Astronaut. He weer de veerte Minsch up den Maand.

Inholtsverteken

WerdegangÄnnern

Alan Bean hett sien Schoolafsluss an de Paschal High School in Fort Worth (Texas) maakt. Ansluutend studeer he an de Universität of Texas un kreeg 1955 den Ingenieursgrad in den Beriek Luftfohrttechnik. In dat sülvig Johr is he de US-Marine bitreeden, hett den Pilotenschien maakt un wurr en Angreepstaffel in Jacksonville (Florida) todeelt. Nah en veerjohrig Deensttiet hett he de Testpilotenschool vun de Marine besöcht un hett ansluutend an de Erprobung vun nee Floogtüüchtypen mitarbeit.

Bi de NASAÄnnern

Bean hett sück bi de NASA för de tweet Astronautengrupp bwurben, wurr aber nich annommen. Bi de nächste Bewerbung harr he aber mehr Spood un wurr an' 17. Oktober 1963 vun de NASA tosommen mit 13 anner Kollegen offiziell vörstellt.

GeminiÄnnern

Af Februar 1965 övernehm Bean in dat Gemini-Programm as Spezialrebeet de Bargenssysteme vun de Ruumscheep. In' Dezember 1965 weer he bi de Missionen vun Gemini 7 un Gemini 6 as Verbinnenspreeker (Capcom) in Cape Canaveral.

Tragischerwies weer de Dood vun twee Astronauten-Kollegen, de de Loopbahn bi Bean as Astronaut wat vöranbroch. Elliott McKay See und Charles Arthur Bassett keemen an' 28. Februar 1966 bi en Floogtüüchafstört to Dood, un Alan Bean hörr to de söben Mann stark Kommission, de den Afstört ünnersöken sull. See un Bassett weern för Gemini 9 vörsehn, so dat dat to Umschichtungen in de Mannschapstowiesen keem, wordör Bean as Ersatzkommandant vun Gemini 10 indeelt wurr. Ofschons he noch kien Weltruumerfohrung harr, weer Bean somit de eerste Astronaut vun de darte Utwahlgrupp, de för en Kommando nomineert wurr.

För den Floog vun Gemini 11 in' September 1966 weer he weer as Capcom tätig, ditmal vun de Floogleitzentraal in Houston.

Apollo Application ProgramÄnnern

In' Ansluss an dat Gemini-Programm wurr Bean to dat Apollo Applications Program todeelt. Upgaav vun disse Afdeelen weer dat, neben de Maandlandungen noch wiedere Gebruuksmögelkeiten för de Apollo-Ruumscheep un Saturn-Raketen to ünnersöken. Dat eenzige Projekt, dat dorvan later umsett wurr, weer de Ruumstatschoon Skylab.

ApolloÄnnern

 
Alan Bean up den Maand

Ok bi de tweete Indeelen vun Bean as Ersatzmann gung de Dood vun en Kolleeg vörut. Clifton Curtis Williams weer as Ersatzpilot för de Maandlandefähre vun de tweet Apollo-Mission indeelt, is aber bi en Floogtüüchafstört an' 5. Oktober 1967 to Dood kommen, worup sück de Ersatzkommandant Charles Conrad dorför insetten dee, dat Bean in dat Team rücken sull. So wurr Alan Bean Ersatzmann för den eersten Insatz vun en Pilot för de Maandlandefähre.

Oorsprünglich weer dat as tweet bemannt Apollo-Floog mit de Beteeken Apollo 8 plaat, so dat Conrad, Gordon un Bean hoopen kunnen, as Hööftmannschap för Apollo 11 indeelt to wurrn, wat de fröhestmögelk Versöök vun en Lannen up den Maand wurrn kunn. Wiel aber de Flüüg umplaant wurrn, wurr de Maandfährentest aber to Apollo 9. Nah deren spoodrieken Insatz in' März 1969 wurrn Conrad, Gordon un Bean an' 10. April 1969 as verwacht to de Hööftmannschap vun Apollo 12 nömmt. Bean weer intüschen de eenzige Astronaut vun de dart Utwahlgrupp, de ahn Weltruuminsatz weer.

Bi den Start vun Apollo 12 an' 14. November 1969 wurr de Rakeet vun en Blitz drapen, wat to'n Verlust vun sämtlich Telemetriedaten führen dee. John Aaron, en jung Mitarbeiter in de Floogleitung, leet över den Capcom de Upfordern "SCE to AUX" utrichten. Bean weer de eenzige, de dit wenig begäng Kommando verstahn dee, hett de Datenupbereitensanlaag SCE up Notbedriev (AUX) schalt un stell dormit de Telemetrieöverdragen weer her.

 
Alan Bean övergifft de Utstellung Sternstunden in' Gasometer Böverhuus in' März 2010 en Stück Maandgesteen

An' 19. November 1969 hett Alan Bean as veert Minsch den Maand betreeden, wo he en Isotopenbatterie to Energiegewinnung för verscheeden Experimente upstellen dee un in Bedriev nehm. Sien Kommandant Conrad weer ok up den Maand, wiels Richard Gordon in dat Moderschipp wiederhen den Maand umkreisen dee. Bean hull sück all tosommen 7 Stünn un 45 Minüüt buterhalv vun de Maandfähre „Intrepid“ up.

De tweet Weltruuminsatz vun Bean weer dat Kommando vun de Mission Skylab 3. Hier stell he mit sien Kollegen Owen Garriott un Jack Lousma tüschen den 29. Juli un 25. September 1973 mit 59 Daag en neen Langtietweltrekord up, de allerdings kört dorup vun Skylab 4 weer braaken wurr.

Förr dat Apollo-Sojus-Projekt in' Juli 1975 weer Bean nochmal as Ersatzkommandant indeelt, keem aber nich to'n Insatz.

Manager-TätigkeitÄnnern

In' Oktober 1975 is Alan Bean in' Rang vun en Kapitän zur See ('Captain') ut Deensten vun de US-Marine utscheeden, bleev aber de Astronautentrainingsgrupp as deren ziviler Chef erhollen. Vun dissen Deenst is he denn an' 26. Februar 1981 torüchtreeden.

Karriere as KünstlerÄnnern

All wiels sien Tiet as Testpilot hett sück Bean mit de Maleree befaat. Nah sien Utscheeden ut de NASA hett he sien Hobby to'n Berop maakt. Dorto hett he sück en lütt Studio in Houston upbaut. Völ vun sien Warken, de sück meest mit de Weltruumfohrt un den Upenholt up den Maand befaaten, sünd in dat Internet to sehn.

PrivatesÄnnern

Alan Bean is scheedt un hett een Söhn un een Dochter.

WeblenkenÄnnern

  Alan Bean. Mehr Biller, Videos oder Audiodateien to’t Thema gifft dat bi Wikimedia Commons.