Alexander Stepanowitsch Wiktorenko

Alexander Stepanowitsch Wiktorenko (russisch: Александр Степанович Викторенко, wetenschaplich Transliteratschoon Aleksandr Stepanovič Viktorenko; * 29. März 1947 in Olginka bi Petropawlowsk, Nordkasachstan, Kasachische SSR; † 10. August 2023) weer en sowjeetsch Kosmonaut. He hett all tosommen 489 Daag in’t All verbrocht un liggt dormit up Platz 9 up de List vun de Ruumfohrer mit de meest Erfohrung.

Ruumfohrertätigkeit

Wiktorenko weer Pilot vun de sowjeetsch Luftwappen, bevör he 1978 as Kosmonaut utwählt wurr. 1985 un 1986 weer he in de Ersatzmannschap för Sojus T-14 un Sojus T-15, de beid letzt Flüüg to de Ruumstatschoon Saljut 7.

To sien eersten Ruumfloog keem Alexander Wiktorenko an’ 22. Juli 1987 as Kommandant vun dat Ruumschipp Sojus TM-3. Tosommen mit Alexander Alexandrow un den Syrer Muhammed Achmed Faris is he to de Ruumstatschoon Mir, de to disse Tiet mit Juri Romanenko un Alexander Lawejkin bemannt weer. Nah een Week is Wiktorenko tosommen mit Faris un Lawejkin in Ruumschipp Sojus TM-2 land.

För de sowjeetsch-franzöösch Mission mit Sojus TM-7 in dat Johr 1988 weer Wiktorenko Ersatzmann.

To sien eerst Langtietupenholt an Bord vun de Mir is Wiktorenko an’ 5. September 1989 mit Sojus TM-8 start. Tosommen mit Alexander Serebrow nehm he de Ruumstatschoon, de veer Maand lang unbesett ween weer, wedder in Bedriev. Wiktorenko un Serebrow bleeven över fiev Maand in’ Weltruum.

För den Floog vun Sojus TM-13 van Oktober 1991 bit März 1992 weer Wiktorenko Ersatzmann för Alexander Wolkow.

To sien darten Ruumfloog is Wiktorenko an’ 17. März 1992 tosommen mit Alexander Kaleri un den Düütschen Klaus-Dietrich Flade in dat Ruumschipp Sojus TM-14 start. Dat weer de eerste russische Mission, nahdem dat de Sowjetunion nich mehr geev. Wiktorenko un Kaleri bleeven up de Ruumstatschoon as elfte Langtietbesatten, wiels Flade mit de Mannschap von Sojus TM 13 (Alexander Alexandrowitsch Wolkow un Sergei Konstantinowitsch Krikaljow) torüchfleegen dee. An' 10.August gung hör Mission to Enn', nahdem de twalfte Stammbesatten (Anatoli Jakowlewitsch Solowjow un Sergei Wassiljewitsch Awdejew) tosommen mit den Franzoosen Michel Tognini) up de Ruumstatschoon ankommen weer. Tognini ist denn gemeensam mit Wiktorenko un Kaleri weer to de Eer torüchkehrt.

To sien veert un letzt Ruumfloog is Wiktorenko an’ 3. Oktober 1994 mit dat Ruumschipp Sojus TM-20 upbraken. Mit an Bord weern de Düütsche Ulf Merbold un Jelena Kondakowa, de as eerste Fru en Langtietmission fleegen sull. Wiktorenko un Kondakowa bleeven över fiev Maand in’t All, wiels Merbold nah een Maand an Bord vun de Mir mit Juri Iwanowitsch Malentschenko un Talghat Mussabajew torüchfleegen dee.

As Wiktorenko am’ 22. März 1995 lannen dee, harr he all tosommen 489 Daag in’t All verbrocht. To de Tiet kunnen blots Waleri Poljakow mit 678 Daag un Mussa Manarow mit 541 Daag mehr upwiesen.

Enn’ Mai 1997 is Wiktorenko ut den aktiven Kosmonautendeenst utscheeden un wurr Utbilder an dat Juri-Gagarin-Kosmonautentrainingszentrum.

Alexander Wiktorenko is verheiraadt un hett twee Kinner.

Weblenken

• spacefacts.de: Körtbiografie
• space.kursknet.ru: Körtbiografie (engelsch/russisch)