Alexander Alexandrowitsch Serebrow

Alexander Alexandrowitsch Serebrow (russisch: Александр Александрович Серебров}}, wetenschaplich Transliteratschoon Aleksandr Aleksandrovič Serebrov; * 15. Februar 1944 in Moskau, Russische SFSR; † 12. November 2013 ok dor) weer enn sowjeetsch Kosmonaut.

Alexander Serebrow in dat Johr 2011

Anfang vun sien Loopbahn

Nah sien Schoolafsluss 1961 hett Serebrow bit 1967 an dat Moskauer Institut för Physik un Technologie (MIPT) studeert. Wiedere Afslüsse hett he dor 1970 maakt un 1974 an de Universität des Marxismus-Leninismus. Af September 1970 hett Serebrow as Assistent in den Beriek „Physikalische Mechanik“ vun dat MIPT arbeit.

In' Dezember 1974 kreeg Serebrow den akademischen Grad vun en Kandidaten vun de technisch Wetenschapen. Sien Afslussarbeit hannel vun „Hittschuulprobleme[n] vun en bemannt Ruumfloogkörper bi dat Indringen in de Eerdatmosphäär nah en Marsfloog“.

Van August 1976 bit Dezember 1978 hett Serebrow bi dat Konstruktschoonsbüro NPO Energija arbeit, wo he an de Entwicklung un Utprobeeren vun Ruumfloogkörper bedeeligt weer. In disse Tiet hett he ok an dat Utwahlverfohren för Kosmonauten deelnommen.

Ruumfohrertätigkeit

Utwahl un Grundutbillen

An' 1. Dezember 1978 wurr Serebrow as Kosmonautenkandidat annommen. In sien Grupp, mit de he de Utbillen denn maakt hett, weern noch söss wiedere Ingenieure vun Energija, veer Ingenieure vun ZKBM (vörmals OKB-52), twee Piloten un dree Dokters. Sien Afslussexamen hett he an' 5. Oktober 1980 bestahn.

Eerste Floog 1982

Serebrow hett sien eersten Insatz as Ruumfohrer van' 19. bit 27. August 1982 mit de Mission Saljut 7 EP-2 harrt. Tosommen mit Leonid Popow un Swetlana Sawizkaja flog he in dat Ruumschipp Sojus T-7 to de Ruumstatschoon Saljut 7, de to disse Tiet vun de eerst Langtietbesatten Anatoli Beresowoi un Walentin Lebedew bemannt weer. Torüch keemen se mit dat Ruumschipp Sojus T-5.

Tweete Floog 1983

In' Dezember 1982 wurr Serebrow in de Ersatzmannschap vun de nächste Langtietmission Saljut 7 EO-2 indeelt. In' März 1983 rück he in de Hööftmannschap nah un hett dor Irina Rudolfowna Pronina ersett.

Somit keem he all nach acht Maand to sien tweeten Ruumfloog. De Start mit dat Ruumschipp Sojus T-8 weer an' 20. April 1983, tosommen mit Wladimir Titow un Gennadi Strekalow. De Kopplung mit de Ruumstatschoon Saljut 7 hett denn aber nicht funktschoneert un de Mission muss afbraken wurrn. De Landung weer denn all an' 22. April 1983.

Nee Todeelen

Af September 1984 befunn sück Serebrow weer in' Training för en Floog to Saljut 7. He wurr Kommandant Moskalenko un Bordingenieur Solowjow todeelt. Af September 1985 wurr he weer Kommandant Titow todeelt un hett för en Langtietupenholt an Bord vun de nee Ruumstatschoon Mir traineert, de an' 19. Februar 1986 start wurr.

Titow un Serebrow harrn de tweet Langtietbesatten billen un mit Sojus TM-2 starten sullen, aber Serebrow wurr krank, so dat in' Januar 1987 de Mannschapen uttuuscht wurrn. Statt Titow un Serebrow ist de Ersatzmannschap Romanenko un Lawejkin flagen. Titow kommandeer dorup de darte Langtietbesatten.

Ersatz för TM-5 un TM-7

Enn' 1987 nehm Serebrow weer Vörbereitungen för en Insatz up de Mir up. Af Januar 1988 traineer he as Ersatzmann för de veerte Langtietbesatten för de Mir, tosommen mit Kommandant Wiktorenko. To de Mannschap hörr ok de Franzoos Tognini, de Ersatzmann för de sowjeetsch-franzöössche Mission Mir-Aragatz.

Wiels de Vörbereiten up de Mission wurr Serebrow in' März 1988 en tweeten Floog as Ersatzmann todeelt. Bi de sowjeetsch-bulgaarsch Mission Mir EP-2 weer Ersatzmann Andrei Saizew krank wurrn, un Serebrow is in de dortige Ersatzmannschap uprückt, so dat he sück to glieker Tiet up twee Missionen vörbereiten muss.

Mir EP-2 funn in' Juni 1988 mit Sojus TM-5 un Sojus TM-4 statt, un Serebrow keem nich to'n Insatz. Ok de Start to de veerte Langtietmission mit Sojus TM-7 in' November 1988 funn ahn Serebrow statt.

Darte Floog 1989

För de fievte Mir-Langtietbesatten is Serebrow in' Dezember 1988 tosommen mit Wiktorenko in de Hööftmannschap upsteegen. De oorsprünglich för April 1989 vörsehn Floog verzöger sück aber wegen Problemen mit dat Sojus-Ruumschipp Sojus TM-8. De veerte Mannschap, Wolkow, Krikaljow un Poljakow muss de Ruumstatschoon verlaaten, wiel de Bruukdüer vun hör Ruumschipp Sojus TM-7 afloopen weer. Mir bleev mehrere Maand lang unbemannt.

De Start vun Sojus TM-8 weer denn an' 5. September 1989. Twee Daag later hemm Wiktorenko un Serebrow an de unbemannte Ruumstatschoon ankoppelt un hemm de weer in Bedriev nommen.

An' 6. Dezember 1989 wurr de Mir wieder maakt, indem dat Modul Kwant 2 ankoppelt wurr. Wiktorenko un Serebrow mussen dorto de Mir vun Hand utrichten, wiel de automatische Stüerung utfallen weer.

Serebrow führ fiev Weltruumutstieg mit tosommen över 17 Stünn Düer dör. Bi den eersten wurr an' 8. Januar 1990 en Steernsensor an Kwant 2 anbrocht, bi den tweeten an' 11. Januar wurrn Experimente an de Butensiet vun Mir rinhaalt.

De darte Utstieg an' 26. Januar deen to dat Testen vun den neen Ruumantoog Orlan DMA. Bi den veerten Utstieg an' 1. Februar 1990 hett Serebrow den Raketenrucksack SPK test. Dorbi hett he sück bit to 33 m vun de Mir wegbewegt, weer aber dör en Lien sekert. Bi den fievten Utstieg an' 5. Februar harr Wiktorenke den Test mit den SPK to maken und Sereebrow hett hüm assisteert.

Veerte Floog 1993/94

Af Februar 1993 befunn sück Serebrow weer in de Vörbereitung up en Ruumfloog, ditmal tosommen mit Wassili Ziblijew as 14. Langtietbesatten vun de Mir. Mit to de Mannschap hörr de Franzoos Jean-Pierre Haigneré, de för de Körttietmission Mir-Altair mit an Bord weer.

De Start mit Sojus TM-17 weer an' 1. Juli 1993. Serebrow weer dormit nah Wladimir Dschanibekow un Gennadi Strekalow eerst de darte Russe mit veer Ruumflüüg.

Serebrow führ weer fiev Weltruumutstieg dör, ditmal mit en Gesamtdüer vun över 14 Stünn. Ünner annern hemm he un Ziblijew dorbi en nee Gidderstruktur to de Upnahm vun tosätzlich Experimenten anbrocht.

Nah de Landung an' 14. Januar 1994 harr Serebrow 372 Tage in't All verbrocht un weer dormit up Platz 7 vun de Ranglist vun de erfohrensten Ruumfohrer vörrückt.

Nah de Ruumfohrer-Loopbahn

Serebrow is an' 10. Mai 1995 ut Öllersgrünnen un dat Kosmonautenkorps utscheeden. He wurr Referent för Ruumfahrtangelegenheiten bi den Berader vun den russischen Präsidenten, J. Schaposchnikow.

Privates

Serebrow weer verheiraadt un harr een Söhn. Vun sien Moders Siet her weer he poolsch Afstammen un kunn ok poolsch snacken.

Utteknungen

Serebrow kreeg verscheeden sowjeetsch Utteknungen, ünner annern den Titel Held der Sowjetunion. Dorneben kreeg he ok noch bulgaarsch un franzöösch Utteknungen.

Weblenken

Alexander Alexandrowitsch Serebrow. Mehr Biller, Videos oder Audiodateien to’t Thema gifft dat bi Wikimedia Commons.

• Serebrow in de Encyclopedia Astronautica (engelsch)
• spacefacts.de: Körtbiografie
• space.kursnet.ru: Biografie (engelsch/russisch)
• Serebrow bi astronaut.ru (russisch)