Allerfähr Odersen-Wessen
De Allerfähr Odersen–Wessen is en Fähr, de de beiden Öörd Odersen un Wessen in’n Landkreis Veern över de Aller hen verbinnen deit.
Historie
ännern_IMG_9237.jpg)
De Fähr verbinnt de beiden Dörper siet dat 16. Johrhunnert. 1904 hett de Fischer Heinrich Hoffmann den Fährbedriev övernahmen un en neet Fährhuus boot. Düt Fährhuus is in’n April 1945 afbrennt, as de Briten den Oort innahmen un dorbi beschaten hebbt. Na 1945 is aver en neet Fährhuus boot worrn. Bet 1954 hett en 20 Meter langen Prahm Veh, Peerfurrwarken un Minschen översett. Von 1954 bet 1967 hett en 4,50 Meter lang Delenboot noch Footgängers un Radfohrers översett.
1967 is en ne’en un högeren Allerdiek anleggt worrn. Dorbi is dat Fährhuus afreten worrn. Dorüm is de Fährbedriev an’n 31. August 1967 instellt worrn. 30 Johr lang hett dat denn keen Fähr mehr geven.
1997 hett sik denn aver de Heimaatvereen Odersen insett, dat dat wedder en ne’e Fähr gifft. Op de AUCOOP/BBV-Warft in Bremen-Vesack is en 6 Meter lang Delenboot ut Ekenholt boot worrn, dat an’n 1. Mai 1997 op’n Naam Marie Hoffmann döfft worrn is. De Naam kummt von de letzte Fährfro, de tohoop mit ehren Mann Heinrich Hoffmann de Fähr bedreven hett.
To’n 1. Januar 1999 hett sik en egenstännigen Heimaat- un Fährvereen Odersen billt. De Fähr is good annahmen worrn: rekent harr de Vereen mit 3000 Lüüd in’t Johr, in de eersten dree Johren weren dat aver al 19.000 Lüüd, also mehr as dat dubbelte. De Vereen hett dorüm en gröttere, 7,50 Meter lange Prahmfähr bi de Wikinger-Bootswarft in Willemshaven in Opdrag geven. Se is an’n 30. April 2000 op’n Naam Marie Hoffmann II döfft worrn.[1]
De Marie Hoffmann II is 7,50 Meter lang un 2,70 Meter breed. Dat apene Fährboot hett Sittplätz för bet to 18 Lüüd un Platz för Fohrrääd. Roptokamen is dor över en 1,65 Meter brede Klapp an’n Boog. Andreven warrt de Fähr mit en 8-kW-Elektro-Binnenboordmotoor, de sien Stroom ut en 290-Ah-48-Volt-Gelbatterieblock (8 x 145 Ah 12 V) kriggt. De Batterieblock warrt von en Solarpaneel-Anlaag laadt, de op en Biliggerboot installeert is. Dat Boot kann in’n Noodfall ok mit Roderremen an Land brocht warrn.[2]
In’n Sommer 2016 is en ne’e Solar-Fähr trech worrn, de ok wedder den Naam Marie Hoffmann driggt. Se is ut Aluminium boot, dat ok Seewater afkann. De Fähr is 30 cm breder as de Marie Hoffmann, dat ok E-Bikes good Platz hebbt. De Bo von de Fähr is mit 65.000 Euro ut Leader-Middels för dat Aller-Laane-Daal fördert worrn.[3]
Weblenken
ännern
Allerfähr Odersen-Wessen. Mehr Biller, Videos oder Audiodateien to’t Thema gifft dat bi Wikimedia Commons.
Footnoten
ännern- ↑ Historie von de Fähr Marie Hoffmann
- ↑ Technische Daten von de Fähr Odersen-Wessen
- ↑ Aller-Leine-Tal: Allerfähre ist erstes neues Projekt. Björn Gehrs, Vorsitzender der LAG Aller-Leine-Tal und Samtgemeindebürgermeister, afropen an’n 8. Mai 2016.
Koordinaten:52° 50′ N, 9° 18′ O