Allerhilligenfloot 1570

De Allerhilligenfloot 1570 weer en Stormfloot, de an Allerhilligen (1. November) över de Waterkant vun Düütschland, de Nedderlannen un Belgien keem. De Tall vun de Doden warrt op üm un bi 20.000 taxeert. En lang anduernden Storm harr dat Water noch höger oppietscht as bi de Stormfloot 1953.

De Domänenraat in Bergen op Zoom hett vörher al en Warnen vör de Floot rutgeven, wat aver nich veel hulpen hett. Dat weer dormit, so veel wi hüüt weet, dat eerste Maal, dat dat vör en Floot en Warnen geev.

In dat hüdige Verdrunkene Land vun Saeftinghe sünd veer Dörper ünnergahn. De Eilannen Wulpen, Koezand, Cadzand un Stuivezand in Seeland sünd kumplett wegspöölt worrn. In Oostfreesland sünd de Dörper Olendörp un Westbense ünnergahn. In'n scheven Toorn vun Suurhusen is en Gedenksteen an de Floot inmuert, de na de Chröönk vun David Fabricius 3000 Dode in Freesland foddert hett.

Ok in Olland un in de Veer- un Marschlannen sünd vele Dieken braken.