Aloha (Hawaii)

Aloha is een Woort ut de Spraak vun Hawaii. Hüdigendags warrt dat meist öbersett mit Wöör as „Leevde“, „Geernhebben“, „Leevde to’n Neegsten“ oder „Mitleed“. In Hawaii warrt dat bi’t Kamen un Gahn to’n Gröten seggt.

Aloha kakahiaka heet „Goden Morgen“ Aloha auinala heet „Goden Dag“ un Aloha ahiahi heet „Goden Abend“. Aloha kakou heet so veel, as „Schön, dat Ji all tohopen dor sünd“.

Midderwielen warrt dat Woort Aloha in de ganzen USA bruukt. Dat liggt an verscheden Filmstriepen un TV-Serien, de allerwegens in de USA to sehn weeren, as Elvis Presley sien Film Blue Hawaii , as de Serie Magnum mit Tom Selleck un as de anner Serie Hawaii Fiev-Null.

Dat warrt geern seggt, Hawaii weer vull vun den Aloha Spirit. Dat schall heten, up Hawaii sünd de Lüde fründlich un freit sik öber Frömden. Dorvun hett Hawaii ganz offiziell den Ökelnaam The Aloha State kregen. De Aloha Tower is dat Wahrteken vun Honolulu un dat Aloha-Stadion is de gröttste Sportstäe in Hawaii. An den Aloha Friday dröövt all de Beamten un Anstellten, de süß mit Packje rümlopen mütt, sik dat Aloha Shirt antrecken (dat is dat Hawaii-Hemd).

As dat baben seggt worrn is, warrt Aloha hüdigendags bi'n Gröten bruukt, man to glieke Tiet is dat een Segen. De lest Königin Liliuokalani hett seggt, Aloha, datt heet „Vör dat Antlaat vun Gott sienen Aten stahn“. Se meen ok: „Keen Minsch ut Hawaii dröff düt Woort utspreken, ... wenn he nich mit sien Gegenöber in Freden weer.“

Böker

Albert J. Schütz: Hawaiianisch. Kenntnis und Verständnis. Abera-Verlag, Hamborg 1998. (Abera Language Kit, 1) ISBN 3-931567-17-6