De altaischen Spraken, ok Altaispraken nöömt, sünd en hypothetische Spraakfamilie ut wat 60 in Eurasien verbreidte Spraken mit rund 200 bet 210 Millionen Snackers. Düsse Beteken geiht op de zentraalasiatischen Altaibargen torüch, de fröher as Urheimat vun düsse Spraken annahmen worrn.

De altaische Spraakfamilie besteiht luut ehr Beförwoorders ut tominnst dree ünnerdeelte Spraakfamilien, de Turkspraken, de mongoolschen un de tunguuschen Spraken. Düsse dree Spraakfamilien besitt typoloogsche, phonetische, morpholoogsche un lexikaalsche Gemeensamkeiten, de dörch somige Wetenschopplers as Bewies för ehr genetische Eenheit un somit Rüchföhrborkeit op en gemeensame Vörgängerspraak (Protospraak) ansehn warrt. Wedderüm annere Forschers seht düsse Gemeensamkeiten leddiglich as Folg vun luudliche, lexikale un strukturelle Lehnen an, de dörch langtiedige areale Kontakt twüschen düsse Spraakgruppen worrn sünd.