Spraakfamilie
Ene Spraakfamilie is in de Spraakwetenschop en Kunstrukt, dat en Reeg Spraken tohoopfött, de sik ut en gemeensame Oorspraak utwickelt hebbt.
En Bispeel is de Spraakfamilie von de romaanschen Spraken. Dor höört ünner annern Franzöösch, Spaansch, Portugeesch, Italieensch un Rumäänsch to. All disse Spraken gaht trügg op dat Latiensche. Düsse Verwandtschop lett sik över de schreven Spraak good nawiesen. De Spraakfamilie von de romaanschen Spraken wedder höört to de indogermaanschen Spraken un is ünner annern verwandt mit de Germaanschen Spraken, de Slaavschen Spraken un de Indoiraanschen Spraken. Dat lett sik nich so licht över de schreven Spraak nawiesen, denn as de indogermaansche Oorspraak snackt worrn is (so bi 3000 Johr vör Christus), dor hett dat noch keen Schrift geven. Dor kümmert sik de vergliekende Spraakwetenschop üm, de sik ankickt wat för un woveel verwandte Wöör Spraken hebbt.
Dat gifft en Reeg Forschers, de versöökt, grote Spraakfamilien so as dat Indogermaansche noch wieder to gröttere Spraakfamilien (Makrofamilien) tohooptofaten. Düsse Makrofamilien sünd denn aver al so unseker, dat dat kuum noch to bewiesen is.
En Spraak, bi de de Forschers keen annere verwandte Spraak kennt, warrt isoleerte Spraak nöömt.