Apella

Apella weer in dat antike Sparta de Naam vun de Volksversammeln. Dat weer de Raat, wo all Homoioi tohöörn döen.

Historie

So, as dat in Grekenland överlevert wurrn is, schall de Apella upstellt - oder nee up Schick bröcht (?)- wurrn ween vun Lykurg. Dat weer de Gesettgever in de Legennen vun Sparta. Richtig Liddmaat weern konn een eerst mit 30 Jahren. In'n Prinzip is de Apella eenmol in'n Maand tohopenkamen. Dorto is se tosamenropen wurrn, toeerst vun de Königen vun Sparta, vun dat 6. Johrhunnert v. Chr. af an vun de Ephoren.

Wat de Apella maakt hett un wo se för tostännig weer

De Liddmaten vun de Apella besnacken de Vörslääg för nee'e Gesetten (ῥήτραι / rhètrai), de vun de Ephoren oder ok vun de Gerusia inbröcht wurrn sünd. Dor stimmen se ok över af. Tohopenfaat hett sik de Apella mit düsse Saken afgeven:

• mögliche Ännern vun de Gesetten
• Beslüss, wenn dat Striet geev över de Frage, wen de Throon in Sparta tostünn
• Anstellen un Updrääg vun un för Befehlhebbers bi dat Militär
• Wahl vun nee'e Ephoren, Magistraten un Liddmaten vun de Gerusia
• Beslüss över Krieg un Freden un över dat Sluten vun Verdräge