Apparatspott – Dat mokt wie gistern
Apparatspott – Dat mokt wie gistern is de drüdde Film ut de plattdüütsche Apparatspott-Reeg vun de Filmemokers ut Sulingen. As de eersten beiden ok, stellt di Film en Parodie op de Feernsehregen un de Kinofilmen vun de Star-Trek-Reeg dor. Aver ok op annere Science-Fiction-Filmen un Spökenkraam anspeelt. So sünd de „Buern in swart“ ’n Anspelen op de so nöömten Men in Black, un Robert Hut en Interpretatschoon vun Robin Hood, wiel de Tietröhr utsütt as in de Feernsehreeg The Time Tunnel ut de 1960er Johren.
| Filmdaten | |
|---|---|
| Plattdüütsch Titel: | Apparatspott – Dat mokt wie gistern |
| Originaltitel: | Apparatspott – Dat mokt wie gistern |
| Produkschoonsland: | Düütschland |
| Johr vun’t Rutkamen: | 2008 |
| Läng: | 108 Minuten |
| Originalspraak: | Plattdüütsch |
| Öllersfreegaav in Düütschland: | FSK 6 |
| Filmkru | |
| Speelbaas: | Martin Hermann |
| Dreihbook: | Martin Hermann, Uwe Hermann |
| Produkschoon: | Martin Hermann |
| Musik: | Martin Hermann |
| Kamera: | Martin Hermann Thomas Karstädt Wolfgang Wortmann |
| Snitt: | Martin Hermann |
| Dorstellers | |
| |
De Premiere vun dissen drüdden Deel weer an’n 28. März 2008 in Deefholt. Blangen de bekannten Figuren un Schauspelers sünd ok en Reeg vun prominente Lüüd mang jem, as de Komikers Sabine Bulthaupt un Dietmar Wischmeyer.
Inholt
ännern
De Lüüd vun Apparatspott sitt jüst in de Gastweertschop, as en Kerl mit en feinen Antog rinkummt un de Kru vun den Apparatspoot mit en wichtigen Opdrag afhollt. Se warrt an en afsparrten Oort bröcht, woneem en hoochgeheem Forschensprojekt vör sik geiht: De suhlinger Tietröhr. En Maschien, mit de en dör de Tiet reisen kann. Bi’n Test is de Börgermeestersche in den Tunnel lopen un weer weg. Kaptein Kork weer achteran schickt un is nu ok weg. De anneren Apparatspottlüüd schüllt nu ok achteran gahn un de beiden wedder torüch hollen. Chefkoch un Schrotty laat sik breed slahn un gaht in de Röhr. In de Steentiet schüllt se na de beiden Vermissten to söken, man ankamen doot se in’t Middelöller, woneem se fastnahmen un insparrt warrt.
In de Twüschentiet maakt sik Günther, de Treckerfohrer, op de Söök na sien Lanz Bulldog, de em ut de Schüün klaut worrn is. Dorbi stött he ok op dat Spaarrebeet un stiggt dor in. In’n korten Klöönsnack mit de Reinmakerfronslüüd höört he nu ok vun de Tietröhr un lööpt ok bats dor rin. In de Twüschentiet hebbt de Forschers an dat Problem arbeit un finnt nu rut, dat Chefkoch un Schrotty in grote Gefohr sünd. Chefkoch künnt se wedder torüchhollen un schickt em foorts wedder torüch, dat he – söss Stünnen eher – Schrotty befre’en kann. Dorbi dröpt Chefkoch op Robert Hut un sien Lüüd, de em to Help kamt. Man, Professer Winnewerb kriegt langsom sien Twievel, dat se dat mit de Röhr noch henkriegt. He snackt Spick un Kalle (sien Broder Pulle is na Kur vun wegen sien Lebber) goot to, to versöken mit den Apparatspott in de Tiet torüch to reisen un to helpen.
As dat wohrhaftig funkschoneert hett, geiht de Reis mit den Apparatspott wieter in de Steentiet. Dor is ok Günther, de Treckerfohrer, al ankamen un finnt dor sien Bulldog wedder, an den jüst de Neanderdalers rümkrepen doot. De Apparatspottlüüd künnt aver wohrhaftig de Börgermeestersche finnenun ehr mit den Apparatspott weghollen. Man, de Apparatspoot hollt de Belasten nich ut un stört op’n Torüchweg af. So lannt de Kru in’n Willen Westen, woneem se denn ok gliek insparrt warrt, vun wegen dat se sik as Frünnen vun Billy the Kork to kennen geevt. So drapt se sik in’t Gefängnis wedder, woneem se an’n nächsten Dag doodschaten warrn schüllt.
De Tietröhr löpt aver jümmer noch nich. De eenzige, de nu noch helpen kann, is Pulle, den se ut de Lebberklinik ruthollen doot. De warrt mit’n Auto mit’n inboete Tietmaschien achteran schickt, mit dat he sien Lüüd ut’n Knast ruthollt, as de Sheriff jüst bi’n Kusendokter is. Na’n Duell in’n Kortenhuusboen künnt se an’t Enn all redd warrn un wedder na Huus reisen – bit op Kork, de in’n Westen al siet Johren en Familie hett und Chefkoch, de to’n ne’en Sheriff maakt warrt. Un ok bi de Tietröhr verkloort sik opletzt, wat dor scheef lopen is.
Böker
ännern- Falko Weerts: De Apparatspott. Die Schience-Fiction Story der Sulinger filmemoker. Weerts-Verlag, Weyhe 2007; ISBN 978-3-940807-01-4; 120 S. m. veelen Billers
Weblenken
ännern- Apparatspott – Dat mokt wie gistern in de Internet Movie Database (engelsch)
- Websteed to’n Film (hoochdüütsch)