Arno Stabbert
Arno Stabbert (* 31. Dezember 1956 in Cuxhoben) is en düütschen Politiker von de CDU.
Stabbert is 1956 in Cuxhoben boren un hett 1976 an dat Amandus-Abendroth-Gymnasium Abitur maakt. He weer denn bi de Polizei Neddersassen un hett 1976 sien Grundutbildung an de Landspolizeischool Neddersassen in Münnen anfungen. Later weer he an de Neddersassische Fachhoogschool för Verwaltung un Rechtspleeg in Hilmssen un an Fachhoogscholen in Stood un Cuxhoben. Na sien Afsluss as Diplom-Verwaltungswirt 1981 weer he in’n haven Deenst bi de Kriminalpolizei. Von 1981 bet 1986 weer he Wachgruppenbaas in Veern, denn von 1986 bet 1990 Gruppenbaas von en Mobil Insatzkommando bi dat Landskriminalamt Neddersassen in Hannover un von 1990 bet 1994 Deenststellenbaas in Bramsche.
Nadem Stabbert 1994 op de Polizei-Führungsakademie wesen is, weer he bi de Kriminalpolizei in’n högern Deenst. Von 1994 bet 2002 weer he Baas von de Kriminalpolizei in Cuxhoben. 2002 bet 2004 weer he denn Referent bi dat Neddersassische Binnen- un Sport-Ministerium. 2004 un 2005 weer he Behöördenbaas un Polizeipräsident von de Zentrale Polizeidirektion in Hannover.
An’n 22. Mai 2005 is Stabbert mit 50,5 Prozent von de Stimmen in’n eersten Wahlgang as hauptamtlichen Böverbörgermeester von Cuxhobens wählt worrn. He harr dit Amt denn von Juni 2005 bet to’n 31. Oktober 2011, nadem he sik bi de Kommunalwahlen an’n 11. September 2011 nich wedder hett opstellen laten. Sien Nafolger weer Ulrich Getsch.
Stabbert is verheiraadt un hett twee Kinner. He wahnt in Cuxhoben.
