Arteria cerebri anterior
De Arteria cerebri anterior („vördere Bregenslagader“, bi Deerten as Arteria cerebri rostralis betekent), is een vun de dree Hööftarterien vun’n Bregen. As de meisten Adern, kummt se op beide Sieten vun’n Lief vör, gifft dat also tweemol. Se twiegt elk an de Bregenbasis in’t Rebeet vun’n Circulus arteriosus cerebri ut de Arteria carotis interna af. Vör de Sehnervenkrüzen (Chiasma opticum) gifft dat en Anastomoos twüschen de beiden vörderen Bregenslagadern links un rechts, de Arteria communicans anterior nöömt warrt. De Afsnitt vör de kommunizeeren Verbinnen warrt ok A1-Segment nöömt, de Afsnitt dorachter is dat A2-Segment. De tütt in’n wietere Verloop twüschen de Grootbregenhälften üm den Balken (Corpus callosum) rüm. An disse Steed warrt dorto ok Arteria pericallosa seggt.
Versorgt Rebeet
ännernDat Rebeet, dat vun de Arteria cerebri anterior versorgt warrt, kann vun Minsch to Minsch verscheden wesen. Normalerwies sünd dat de vörderen Delen vun’n Hypothalamus, de Grootdeel vun de Basalganglien (över de Arteriae centrales), de Grundflach vun’n Frontallappen un de medialen Hemisphärenflachen vun Frontal- un Parietallappen bit hen na de Mantelkant. In de Endzonen vun de Rebeden, de se vorsorgt, billt se lütte Anastomosen ut mit de Arteria cerebri medialis un de Arteria cerebri posterior. Korte Twiegen versorgt de Sehnervenkrüzen, den Sehnerv un den Tractus opticum.
Folgen bi’t Utfallen
ännernEn Versluten vun de vörderen Bregenslagadern föhrt to en Parees (Lahmen), de vör allen op de Been wirkt, as ok to ünnerscheedlich dull Inschränken vun de motorischen Funkschonen, wieldat de Supplementär-motoorsch Rinn Schaden nimmt. Wenn de Arteriae centrales ok dorvun bedrapen sünd, künnt dör Läsion vun de Capsula interna ok Aphasie, contralateral Hemiparees (gegenhalfsietig Lahmen) un zentrale faziale Parees (Gesichtslahmen) de Naklapp wesen.