Assomada

Assomada (in’t Kapverdische Kreol Somada) is en Stadt ruchweg in de Mitt vun dat Eiland Santiago in de Republiek Kap Verde. De Stadt tellt mit ehr knapp 8.000 Inwahners (Stand vun 2005) to de gröttsten Städer vun de Republiek. Hier ist ok de Seet vun den Distrikt (Concelho) Santa Catarina. De Stadt hett fröher sülvst ok mol Santa Catarina heten.

Assomada 2007 vun’n Utsichtssteed bekeken

Geografie un Landschop

Assomada liggt in’t Binnere vun’t Eiland midden in den Concelho Santa Catarina op en Plateau, dat ümgeven is vun Bargen, Bulten un Ackerland. De Even vun Assomada warrt düchtig to’n Anbo vun Mais bruukt. De Stadt liggt ungefähr op halven Weg an de Straat vun de kapverdischen Hööftstadt Praia na Tarrafal in’n Noorden vun’t Eiland. Över grote Straten kummt man ok goot na São Lourenço dos Orgãos, wat twüschen de Hööftstadt in Assomada liggt, na Ribeira da Barca an de Westküst oder Calheta de São Miguel an de Oostküst vun Santiago.

In’n Süüden vun Assomada liggt de Pico da Anónia, mit 1394 m de hööchste Barg vun Santiago, mit sien tohören Bargland, dat vundaag as en Naturschuulrebeet utwiest is. Wenn een vun Assomada wieter na Noorden föhrt kummt man in dat tweete hoge Bargland vun Santiago, de Serra Malagueta, wat ok jüst so as’n Natschonalpark inricht is. Al siet in dat Rebeet vun Assomada eerstmols Minschen siedelt hebbt, kummt den Oort en grote Bedüden to för de Versorgung mit Nehrmiddel ut de Bueree.

Stadtbild un Weertschop

De Stadt maakt nich jüst den schönsten Indruck, wat dat Bowesen angeiht, as vele Hüüs in de Stadt utseht, as werrn se eerst to Hälft fardig. De Hüüs warrt jümmer blots wieterboot, wenn wedder noog Geld dorför över is oder de utwannerten Besitters af un an mol wedder op Santiago sünd. För dat Eiland stellt Assomada liekers en wichtig Hannelszentrum dor. In de Binnenstadt gifft dat ok noch veel Hüüd, de in ’n portugeeschen Kolonialstil boot sünd. Un över’t Rebeet vun de Stadt verdeelt sik ok, as dat för de Kapverden tyypsch is, enige apentliche Plätz, de so nöömten Praças, woneem sik de Lüüd draat, wenn’t wat to fiern gifft un woneem mitünner ok Musik speelt warrt.

De Markt vun Assomada is een vun de gröttsten in de Stadt. Dor gifft dat en grote Bandbreed vun verscheden Waren ut Handwark un Bueree. Vele Hännlers vun’t hele Eiland kamt in Assomada tosamen, wenn Marktdag is, so dat een de Stadt as’n grote Ümslagsteed för Göder ansehn kann.

Wat een sik ankieken kann

In Assomada geev dat bit 2011 een vun de roren Museen in Kap Verde, dat Museu da Tabanca, dat in dat fröhere Huus vun de Finanz- un Postverwaltung in’t Zentrum vun de Stadt ünnerbrocht weer. Dat Huus sülvst is en histoorschen Bo un bedüden för sien Architektur. Utstellt werrn dor veel Saken, de sik mit de traditschonelle Musikricht Tabanca befaten doot, wies aver ok enige Biller un Schrievereen vun öörtliche Lüüd. 2011 is dat Museum na Chão de Tanque ümtogen in en ländlichen Gootshoff ut dat 19. Johrhunnert.

Blangen de Marktsteed fallt en Bo mit en Kuppeldack op, wat fröher mol en Kalkaven weer. Ok dorbinnen schall in de tokamen Tiet en Utstellen inricht warrn. En feinen Överblick över de Stadt hett een vun de Utsichtsstedd in’n Süüden vun de Stadt. Dor steiht ok en groot Steenkrüüz.

Bildung

In de Stadt gifft dat en wieten Schoolkomplex. Dor befinnt sik blangen en Grundschool ok en wieterföhren Gymnsium, dat Liceu de Amílcar Cabral. Ok de Escola Tecnico is dor ünnerbrocht, en Beroopsschool, woneem de veelversprekensten jungen Lüüd vun Kap Verde op en spoodrieke Karriere vörbereedt warrt.

Weblenken

• Websteed vun’t Raathuus Assomada
• Websteed vun’t Museu da Tabanca (port.)