Santa Catarina (Distrikt)
Santa Catarina is en Verwaltensrebeet (Concelho) vun’t Eiland Santiago in de Republiek Kap Verde. De Concelho ümfaat blots de een Karkengemeen Santa Catarina.
Geografie ännern
De Distrikt liggt in’n Westen vun’t Hööfteiland Santiago un hett en Flach vun 243 km² mit en Inwahnertall vun knapp 50.000. Inricht worrn is de Concelho 1971. Santa Catarina liggt ungefähr 60 km inn Noorden vun de kapverdsche Hööftstadt Praia. De Sitt vun de Verwalten is in de Stadt Assomada, de över en vun de wichtigsten Straten vun’t Eiland mit Praia in’n Süüden un mit Tarrafal in’n Noorden verbunnen is.
De Daalrebeden warrt för’n Ackerbo nütt, man de gröttste Deel vun’n Concelho warrt vun Bargland innahmen, sünners vun den Pico da Antónia un vun’t Naturschuulrebeet Serra Malagueta, mit sien schöön Natur un sünner Barglandschap. De Rest is Grasland mit Buschwark un en poor lütte Wooldstückens, de vör allen in de högeren Lagen antofinnen sünd.
Weertschap ännern
De Hööftborn för’t Inkamen is de Landweertschap. Ruchweg 86 % vun de Inwahners leevt in ländliche Rebeden, so dat de Produkschoon vör allen in Ackerbo un Veehtucht liggt. Dat gifft Rindveeh, Vagelveeh, ’n beten Fischeree un Enkelthannel. Santa Catarina is ok bekannt as de „Koornkamer vun Kap Verde“ un stellt en bedüdenden Markt för de Eilannen dor. De städtschen Inwahners leevt meist all in Assomada.
Wat en sik ankieken schüll ännern
Blangen de schöne Natur gifft dat in den Concelho den Jardim Botânico, also en Botaanschen Gorrn – den eenzigen vun de helen Republiek Kap Verde. In’t kulturell Zentrum vun Assomada is butendem en Museum to finnen, dat sik Museu da Tabanca nöömt.
Beropen Lüüd ännern
- António Mascarenhas Monteiro (*1944), Präsident vun Kap Verde in de Tiet vun 1991-2001.
- Ivone Ramos (*1926), Schrieversche
Weblenken ännern
- offiziell Websteed (port.)
- Museu da Tabanka (port.)