August Grumbrecht
Friedrich Wilhelm August Grumbrecht (* 21. Juni 1811 in Gosler; † 10. Januar 1883 in Horborg) weer en düütschen Politiker.
Grumbrecht is 1811 as Söhn von en Koopmann in Gosler boren. He weer op dat Progymnasium in Gosler un op dat Gymnasium in Bruunswiek un hett von Oostern 1829 bet 1831 Juristeree an de Universität Göttingen studeert. In Göttingen is he 1829 Liddmaat von de Alte Göttinger Burschenschaft worrn un weer in’n Januar bi’n Göttinger Opstand mit dorbi.[1] Na’n Opstand hebbt se em von de Universität smeten un Grumbrecht hett denn bet 1832 an de Universität Marburg studeert. In’n Harvst 1832 dröff he denn na Göttingen trügg un dor wedder studeren.
Na dat Studium weer Grumbrecht toeerst Avkaat in Fambossel un von 1847 bet 1855 in Lümborg. In’n Mai 1848 is he för dat Wendland in de Frankforter Natschonalversammlung wählt worrn[2] un bet 1849 Afornten bleven. He weer von 1850 bet 1852 ok Afornten von’n Hannöverschen Staatsraad. An’n 27. Juli 1855 is he Börgermeester von Horborg worrn un 1856 Liddmaat von’n Landdag in Lümborg. 1856 is he wedder in’n Staatsraad wählt worrn, kunn dat Mandaat aver nich övernehmen, von wegen, dat he dor keen Verlööv von de Stadt Horborg för kregen hett. 1864 weer he aver wedder Afornten in’n Staatsraad un dor Liddmaat von’n Finanzutschuss. In de Johren 1863 bet 1868 weer Grumbrecht Afornten in’n stännigen Utschuss von’n Düütschen volksweertschoplichen Kungress. Von 1867 bet 1871 weer he Maat von’n Rieksdag von’n Noorddüütschen Bund un denn von 1871 bet 1878 för den Wahlkreis Hannover 17 von’n düütschen Rieksdag. Dor weer he in de Natschonalliberale Partei.
Von 1867 bet 1870 un wedder von 1879 bet 1882 weer Grumbrecht Afornten för den Wahlkreis Hannover 29 (Horborg) in dat Prüüßsche Aforntenhuus. He weer ok en ganze Tied Afornten in’n Provinziallanddag Hannover.
Börgermeester von Horborg is Grumbrecht bet to sien Dood 1883 bleven. 1871 is he Böverbörgermeester worrn.[3] Sien Nafolger weer Wilhelm Schorcht.
De Grumbrechtstraat in Heimfeld is 1889 na em nöömt worrn.
Literatur
ännern- Dieter Lent: Grumbrecht, Friedrich Wilhelm August. In: Horst-Rüdiger Jarck, Günter Scheel (Hrsg.): Braunschweigisches Biographisches Lexikon: 19. und 20. Jahrhundert. Verlag Hahnsche Buchhandlung, Hannover 1996, S. 232, ISBN 3-7752-5838-8
Footnoten
ännern- ↑ Kurt Selle: Oppositionelle Burschenschafter im Lande Braunschweig, Wolfenbüttel, 1999, S. 30, online: (PDF; 222 kB)
- ↑ Wendland-Lexikon, Band 1, Lüchow 2000, S. 279.
- ↑ Haunfelder, Bernd / Pollmann, Klaus Erich (Bearb.): Reichstag des Norddeutschen Bundes 1867-1870. Historische Photographien und biographisches Handbuch. Düsseldorf: Droste Verlag, 1989, Foto S. 145, Kurzbiographie S. 409 (Photodokumente zur Geschichte des Parlamentarismus und der politischen Parteien, Band 2)