Böhmen
Böhmen (Tschechisch: Čechy, Nedderlannsch: Bohemen, Engelsch: Bohemia, Franzöösch: la Bohême) is en histoorsche Region in Tschechien. Dat umfaat so bi twee Drüddel vun dat Rebeet vun Tschechien. De Rest vun Tschechien warrt Mähren nömmt un en lüttje Deel höört to Slesien.
Historie ännern
To’n eersten Mol vertellt de Römers wat vun Böhmen: Dat weern de Gemarken, wo de Kelten ehrn Stamm, de Bojers, in wahnen döen. De eersten slaavschen Vorwesers vun de hüdigen Tschechen hefft sik dor in dat 6. Johrhunnert ansiedelt. In dat 9. Johrhunnert höör Böhmen to dat Riek vun Mähren. Dat weer al christlich un keek sunnerlich na dat Byzantiensche Riek hen. As dat Huus vun de Přemysliden later an de Macht keem, orienteer sik dat Land denn mehr an Rom. In dat 11. Johrhunnert is dat Hartogdom Böhmen en Deel vun dat Hillge Röömsche Riek wurrn. De Hartog vun Böhmen is een vun de seven Kurförsten in dat Riek wurrn. Kaiser Henrik IV. hett Hartog Vratislav I. in dat Johr 1085 to’n König vun Böhmen maakt. König Ottokar I. hett dat 1198 henkregen, dat de Kroon vun Böhmen en Arvkroon wurrn is. Unner sien Enkelsöhn Ottokar II. hefft ok Deele vun Öösterriek en tiedlang to Böhmen tohöört. 1335 hett Böhmen ok noch Slesien in’e Hand kregen. Midderwielen weern de Premysliden utsturven un dat Huus Luxemborg hett up’n Throon seten. 1471 is dat poolsche Huus vun de Jagiellonen an de Macht kamen. As Ludwig II. Jagiello doot bleven weer, keem Böhmen 1526 an Öösterriek, man bleev toeerst en unafhängig Königriek. 1618 gung mit de Defenestratschoon vun Prag in Prag de Dartigjöhrige Krieg los. 1627 is Böhmen en Deel vun dat Huus Habsborg siene Stammlänner wurrn, man eerst vun 1743 af an, as dat Habsborgerriek bi gung, sik to zentraliseern, weer dat ut mit de Autonomie vun Böhmen. Na den Eersten Weltkrieg is Böhmen en Deel vun den Staat Tschechoslowakei wurrn, de nee grünnt wurrn weer. Nadem de Tschechoslowakei upspleten wurrn weer, is Böhmen en Deel vun Tschechien wurrn.
Indelen vun de Verwaltung ännern
Neven de Hööftstadt Prag liggt in Böhmen düsse Regionen vun de Verwaltung (krajs):
De Regionen Pardubice, Vysočina un Süüdböhmen liggt over Böhmen un Mähren hen.
Geografie ännern
Dat Land umfaat so bi 52.750 km² un tellt 6,25 Mio. Inwahners. Sunnerlich vun Touristen warrt Böhmen veel besocht, dat gellt besunners for de Stadt Prag un de Naturrebeden „Dat Böhmsche Paradies“ (Český ráj) un de Resenbarge (Krkonoše).
Städer ännern
To Böhmen höört de groten Städer Praag, Plzeň, České Budějovice, Liberec, Teplice un Hradec Králové to.
Wat een sik ankieken scholl ännern
- Lipnomeer
- Adlerbarge
- Böhmsch Paradies (Český ráj)
- Resenbarge (Krkonoše)
- Český Krumlov
Verkehr un Transport ännern
De wichtigsten Straten sünd de Europääsche Weg 50 (D5) vun de Grenz over Prag na Brno hen (D1) un de Europääsche Weg 49 vun Karlovy Vary na Wien hen.
Trivia ännern
- De Naam for de Inwahners vun Böhmen, Böhmers, up Franzöösch Bohemien, warrt in Frankriek bruukt, um dor de Tatern mit to benömen. In Frankriek warrt seggt, de stammen ut Böhmen af. Vun dat 19. Johrhunnert af an warrt de Naam ok bruukt, um dor Lüde mit to beteken, de maakt, wat se wüllt un sik nich an de Traditschoon hoolt.