Becquerel (Eenheit)
| Eenheit | |
|---|---|
| Norm | SI-Eenheit |
| Naam | Becquerel |
| Grött | Radioaktivität, cheemsch Aktivität |
| Eenheitenteken | Bq |
| Formelteken | A |
| nöömt na | Antoine Henri Becquerel |
Becquerel [bɛkə'rɛl], Afk.: Bq, is de afledd SI-Eenheit vun de Radioaktivität.
Dat Formelteken för de Radioaktivität is A. De Eenheit is nöömt na den franzööschen Physiker Antoine Henri Becquerel, de 1903 tosamen mit Marie Curie den Nobelpries för Physik kregen hett för’t Opdecken vun de Radioaktivität. Dat Becquerel is en Maat för de Aktivität sülvst un gifft de Tall vun Atomen an, de in een Sekunn verfallt:
- 1 Bq = 1 s-1
De Eenheit Becquerel is in’t SI-System an de Steed vun en öllere Eenheit för de Radioaktivität sett worrn. Fröher weer dorför dat Curie (Ci) bruukt. De beiden Eenheiten künnt as folgt inenanner ümrekent warrn:
- 1 Ci = 3,7 · 1010 Bq
Ut de meten Aktivität kann över den Dosiskonverschoonsfakter de Äquivalentdosis afschätzt warrn.
Ünnerscheed to dat Hertz
ännernJüst as dat Becquerel is ok de physikaalsch Eenheit Hertz (Hz) in SI-Eenheiten dat glieke as 1/s. Man, dat Hertz warr normalerwies blots för perioodsch Vörgäng bruukt, also üm konstante Afstännen twüschen twee Begeevnissen to meten. Dorgegen is dat Becquerel jümmer de Middelweert vun en stochastische Grött över de Tiet. Wenn de Weert groot noog warrt, kann de aver – as dat in de Praxis bi de Technik to’n Meten maakt warrt – as unendlich annahmen. Denn kann een de tofälligen Swalken na dat Gesett vun de groten Tallen ünnern’n Disch kehren.