Belener Schanz
De Belener Schanz liggt direkt achtern Diek vun de Oost an de Belener Wettern. An’n Anfang vun’n Dörtigjohrigen Krieg is de Schanz anleggt worrn un later in dissen Krieg strieden Dänen un Sweden üm se, vun wegen dat se de Kuntrull över den Ingang vun de Oost un dormit den Weg to’n Seet vun de Bremer Arzbischöp mööglich maken dei.
1630 lann de däänsche König mit 42 Scheep, 1.800 Mannen un 80 Rieders bi de Schanz. De kathoolschen Verdedigers hebbt em aver trüchworpen.
1657 in’n däänsch-sweedschen Krieg rücken de Dänen vun Glückstadt ut an, üm de Schanz, de mit 100 Mann vun de Sweden besett weer, in’n Handstriek to nehmen. De Dänen togen wieder na Bremervöör, dat se na en Belagern ok innehmen kunnen. De Sweden kemen aver mit Verstärk trüch un nehmen de beiden Öörd wedder in, ofschoonst de Dänen an de Belener Schanz middewiels 4000 Mann un 95 Bööd statschoneert harrn.
1687 hebbt de Sweden de Schanz as „militäärsch ahn Bedüden“ slepen. 1712 hebbt se de Schanz mit den nächsten däänsch-sweedschen Krieg wedder opboot, se weer aver nich vun Kämp bedrapen.
Dat nächste Maal hebbt de Franzosen 1811 dat Bowark bruukt, as en Trupp vun 121 Mann hier staschoneert weer. Wedder keem dat to kene Insätz. Nadem de Schanz 1847 för korte Tiet in Stand sett worrn is, sünd toletzt 1864 Soldaten op de Schanz sett worrn, ok ditmal ahn Insatz. Denn is de Schanz kumplett demonteert worrn, vun wegen dat se mit dat, wat dat moderniseerte Militär bruukt, nich mehr mitkeem.
1937 hett de Wehrmacht de ole Schanz noch wedder herricht, as se dor ene Flak-Batteree opstellt hebbt. De Mannstärk weer so wat 120 bet 200 Mann un se hebbt in de Tiet vun’n Krieg 3½ britische Flegers rünnerhoolt. Na den Krieg hebbt se de Baracken 1945 as Lager för de Kriegsfangenen un denn ene Tiet as Flüchtlingslager bruukt. De militäärschen Anlagen sünd twischen 1946 un 1948 sprengt worrn un sünd hüüt op Grund vun den Diekbo in ne’ere Tiet un dat Inwarken vun de Natur kuum mehr uttomaken.
Koordinaten:53° 49′ N, 9° 1′ O