Ben Johnson (Athlet)

Ben Johnson (* as Benjamin Sinclair Johnson; an’n 30. Dezember 1961 in Falmouth) is en ehmaligen kanaadschen Loopsportler vun jamaikaansche Afstammen. Sien Mudder is 1976 mit ehrn Jungen na Kanada utwannert, üm dat Leven ünner arme Bedingen achter sik to laten.

Sportliche Loopbahn ännern

In Kanada is Johnson al fröh mit de Lichtathletik in Kuntakt kamen un haar vör allen in’n 100-Meter-Loop groten Spood. Sünners mit sien Startsprung, den he tomeist mit beide Been un mit veel Kraft maken de, hett he Acht op sik tagen. Dormit hett he sik faken al op de eersten Meters en Vörsprung sekert, den he bit in’t Teel hollen künn.

Konkurrenz to Carl Lewis ännern

Bekannt worrn is Johnson vör allen dör sien Duellen mit den US-Amerikaner Carl Lewis. Bi de Olympschen Sommerspelen 1984 in Los Angeles harr Lohnson bi’n 100-Meter-Endloop noch dat Nasehn. Man twee Johren later künn he be die Goodwill Games in Moskau sien eersten groten Triumph fiern, as he Lewis mit en Tiet vun 9,95 Sekunnen to’n eersten mol in en wichtig Rennen slahn künn. Ok bi’t Tosamendrapen dorna bi de Lichtathletik-Weltmeesterschop 1987 in Rom hett Johnsen wedder wunnen. He hett dorbi in’n 100-Meter-Endloop den dormoligen Weltrekord mit en Tiet vun 9,83 Sekunnen glieks üm en Teihntel Sekunn ünnerboden.

Dopingschandaal ännern

Bi de Olympschen Sommerspelen 1988 in Seoul hett he wedder mit en Weltrekordtiet für sien Konkurrenten Carl Lewis wunnen, de dormols sogor sien egen Besttiet ünnerdrapen hett[1]. Man, disse Spood weer aver vun een vun de gröttsten Schandaals in de Olympia-Historie tonichten maakt. Kritikers harrn vun wegen sien bannige Muskelmasse al länger den Verdacht, dat de Kanadier muskelbilln Steroiden innehmen de. Twee Daag na sien so nöömten „Johrhunnertloop“ is dat denn ok rutkamen. In de Urinproof vun Johnson weern düütliche Sporen vun Stanozolol nawiest, wat en synthetisch anabol Steroid is. Wegen Doping is em dorüm de Goldmedaille wedder afkennt un an den tweetplatzeerten Carl Lewis geven worrn. Johnson hett togeven, dat he al siet 1981 Middels to’n Verbetern vun de Leistung innahmen harr, de nich verlööft weern. Dorna is em ok ahn Nawies vun’n Doping de Weltmeetsertitel vun 1987 un de Weltrekord afspraken worrn, de nadräglich beid an Carl Lewis güngen. Blots sien Bronzemedaille vun de Olypmschen Spelen 1984 dröff he behollen. Butendem is he för twee Johren vun all Wettkämpen utslaten worrn.

Comeback un Sparr op Levenstiet ännern

Johnson künn na sien Comeback 1991 nich wedder an sien fröheren Leistungen anknütten. Bi de Lichtathletik-WM 1991 in Tokio hett he blots as Staffellöper deelnahmen. För de Olympschen Spelen 1992 in Barcelona hett he sik för den 100-Meter-Loop qualifizeeren künnt, is denn aver in’t Halffinale utscheedt. As he bi en Rennen 1993 in Montreal noch mol wedder positiv op Dopingmiddel test worrn is, is he vun de IAAF op Levenstiet sparrt worrn. In de Johren dorna hett Johnson mehrmols versöcht, vör Gericht gegen disse Spaar vörtogahn, hett aver keen vun sien Verfohren winnen künnt.

Johnson hett sik dorophen in annere Sportorden versöcht, as to’n Bispeel as Wide Receiver in’n American Football. Wiet her weer dat mit sien Spood dorbi aver nich. In’t Johr 2003 hett he denn in Italien as Konditschoonstrainer bi’n Footballvereen AC Perugia arbeit.

In’n Dezember 2006 töög Johnson Acht op sik, as he apentlich vermoden de, dat sien fröheren Konkurrent Carl Lewis wat mit sien Dopingfäll to doon harr. He meen: „Ik will nich to veel seggen, man: he harr dormit to doon.“ Dorna schall en US-Footballspeler, de mit Lewis befrünnt weer, em dat verbodene Middel vör de Dopingkontroll in’t Beer kippt hebben.[2][3]

Weblenken ännern

Borns ännern

  1. YouTube: Ben Johnson 100m Final 1988 (instellt an’n 5. September 2007)
  2. Herald Sun: Lewis sabotage claim. 1. Dezember 2006
  3. Focus: Doping-Sabotage: Ben Johnson klagt Carl Lewis an. 6. Dezember 2006