Benedicto Kiwanuka
Benedicto Kiwanuka (* 8. Mai 1922; † 22. September 1972) weer en ugandschen Politiker.
Kiwanuka weer de eerste inheemsche Premierminister vun Uganda un de Föhrer vun de Demokraatsche Partei vun Uganda.
Na sien Schoolafsluss keem Kiwanuka to de King’s African Rifles, wo he in’n Tweten Weltkrieg den Rang vun en Oberstabsfeldwebel harr. Na den Krieg arbeidt he as Dolmetscher an dat Hoge Gericht vun Uganda. Vun 1950 bet 1952 besöch he en Rechtsseminar in Lesotho un studeer denn vun 1952 bet 1956 an dat Universitätskolleg London Recht. In’n Februar 1956 is he vun de Afkatenkamer vun Gray’s Inn opnahmen worrn. Nadem he na Uganda trüchkeem, arbeidt he bet 1959 as Afkaat.
1958 is he to’n Vörsitter vun de Demokraatsche Partei wählt worrn. Nadem siene Partei de Wahlen vun 1961 wunnen harr, is he vun den 1. März 1961 af Premierminister vun Uganda wesen. De Wahlen 1962 aver güngen gegen ene Allianz vun den Volkskongress vun Uganda un Kabaka Yekka verloren, so dat dat Milton Obote weer, de dat Land an’n 9. Oktober 1962 as Premierminister in de Unafhängigkeit föhr.
Kiwanuka is 1969 vun de Regeren ünner Obote in Haft nahmen worrn. Na de Machtövernahm dör Idi Amin keem he wedder free un kreeg dat Amt vun’n Präsident vun dat Hööchst Gericht vun Uganda. Doch in disse Positschoon keem he in Konflikt mit Amin, de sik faken över dat Recht henwegsett. Dat föhr 1972 tolest dorto, dat Kiwanuka dör Lüüd, de to Amin hören, üm’e Eck bröcht worrn is.
