Bernard Wagner
Bernard Wagner (* in Belize-Stadt) is en Politiker ut Belize (PUP).
Wagner is as Söhn von Filomena Wade un den Handwarker Joseph Wagner in Belize-Stadt boren.[1] He weer dor op de Queen’s Square Anglican Primary School un op dat St. Michael’s College.[1] Dat College hett he 1983 afslaten un he is denn na op dat Belize Technical College wesselt.[1] He hett von 1986 bet 1991 bi de Atlantic Bank un von 1991 bet September 2014 bi de Belize Bank arbeidt.[1] För de Belize Bank weer he ünner annern Manager von de Filialen in Dangriga un San Ignacio un hett toletzt as Retail Manager för de Zentraal an’n Market Square in Belize-Stadt arbeidt.[2] In’n September 2014 is he bi de Choice Bank Ltd. anfungen. Wagner hett von 2002 bet 2004 an dat St. John’s College en Associate Degree in Business maakt.[1] He hett von 2011 bet 2013 op en Bachelor of Sciences Banking and Finance an de University of the West Indies studeert.[1] 2006 hett he sik tosätzlich mit dat Ünnernehmen JBW Finance Co. Ltd. sülvstännig maakt.[1]
Wagner is 2017 von de People’s United Party (PUP) as Börgermeesterkannedaat för de Kommunalwahlen 2018 in Belize-Stadt nomineert worrn un hett de Wahl wunnen. He hett an’n 9. März 2018 as Nafolger von Darrell Bradley dat Amt as Börgermeester övernahmen.
