Blomendal (Oortsdeel)

Blomendal (hoochdüütsch Blumenthal) is en Oortsdeel vun de Stadt Bremen un höört to den Stadtdeel Blomendal in Bremen-Nord mit to.

Huus Blomendal

De Herren von Aumund hefft in dat 13. Jahrhunnert en Borg boot. As dat Striet mit de Stadt Bremen geef, is de Borg in dat Johr 1305 kaputt maakt wurrn. 1354 hefft de dormaligen Herren von Aumund, tohopen mit de Ridders ut de Familien Stedinge, von Schönebeck un von der Hude en nee Borg an anner Stäe upboot. Dat weer en Waterborg in de Aue ehr Daal. Düsse Borg mit Namen Huus Blomendal gifft dat hüüt noch.

Bremen harr dor vun Anfang an siene Fingers mit in’t Speel. 1420 is de Familie von Aumund utsturben. In de tokamen Jahren geef dat verscheden Besitters. In dat Johr 1430 weren dat de Herrn von Borch. In düt Jahr keem Blomendal nah Bremen. Bremen hett de Borg denn verhüürt an Ridders, de mit de Stadt in’n goden Freden stünnen, oder hett se as Pand afgeben. Vun dat 17. Jahrhunnert af an seet en Bremer Vagt up de Borg. Huus Blomendal weer ok de Setel vun dat Gericht Blomendal. 1866 keem dor dat preußisch Landratsamt rin. In’n tweten Weltkrieg weer de Borg en Lager för frömde Suldaten, de fungen wurrn weren. Vun 1945 af an wahnden in de Borg Flüchtlingen. Vun 1972 af an is dat Huus Blomendal restaureert wurrn un hüdigendags kann een in de groten Saals vun de Borg wunnerbare Malereen an de Bööns ankieken. Düsse Malereen stammt ut de Tieden vun 1500 bit 1618. In’n Treppenhuus gifft ok noch Malereen ut dat 18. Jahrhunnert.

Dörp un Kark

Bi dat Huus Blomendal geef dat ok Hüser un Lüde, de dor wohnen döen, un so hett de Stadt Bremen 1604 en Karken boot. Den Toorn gifft dat hüdigendags noch. Nah de Kriegen gegen de Sweden hett Sweden 1654 Blomendal vun Bremen öbernahmen, Bremen dröff aber noch en beten mitsnacken. 1715 keem Blomendal denn nah Hannober un vun 1741 af an harr Bremen dor rein gar nix mehr to seggen. Bloß de Haben vun Vegesack is dormals bi de Hansestadt bleben. 1866 keem Blomendal, just so as dat ganze Königriek Hannober, nah Preußen. Vun 1880 af an keem allerhand Industrie nah Blomendal. 1939 is Blomendal denn wedder breemsch wurrn.

Inwohners

1794 hett Blomendal 36 Füürstäen harrt. 1821 leevden dor 282 Inwohners. 1885 weern dat denn 1.664 un 1905 al 9.315 Inwohners. 1960: 24.534 Inwohners; 1974: 10.467 Inwohners; 1995: 10.053 Inwohners.