Brauk (Landkreis Lümborg)

Wapen/Flagg	Koort
Basisdaten
Bundsland: Neddersassen Landkreis: Lümborg Samtgemeen: Bewick Gemeen: Bewick
Inwahners:
Postleettall:	21357
Vörwahl:	04178
Geograafsche Laag:	53° 19′ N, 10° 19′ O

Brauk (hoochdüütsch Bruch) is en lütten Oort in de Gemeen Bewick (Samtgemeen Bewick) in’n Landkreis Lümborg, Neddersassen. De Oort besteiht ut acht Hüüs.

Geografie

Dat Water ut dat Rebeed flütt över’n Düsternhoopenbeek na de Roddau hen af.

De Naveröörd sünd Rottörp in’n Noorden, Handörp un Wittörp in’n Noordoosten, Bewick un Vögelsen in’n Süüdoosten, Mechtsen in’n Süden un Radbrouk in’n Westen.

Historie

Brauk liggt twüschen de Autobahn 39 un de Gleise von de Bahnlien Hamborg–Hannover un hett dorüm swoor ünner Larm to lieden. As de Bahnlien op dree Gleise utboot worrn is, hett de Gemeen Bewick 2011 op egen Kösten en 1,5 Kilometer langen un 3,50 Meter hogen Larmschuulwall anleggt, de 500.000 Euro köst hett (300.000 för de Gemeen un 200.000 för de Düütsche Bahn). En Anrecht op Larmschuul harrn de Bewahners na dat Gesett nich, denn Brauk höört kumplett to dat Butenrebeed.

Verwaltungsgeschicht

De Oort hett fröher to’n Kreis Lümborg tohöört, de 1932 mit’n Kreis Bleikd to’n hüdigen Landkreis Lümborg tohoopgahn is.

Brauk höört al jümmer bi de Gemeen Bewick mit bi.

Religion

Brauk is evangeelsch-luthersch präägt un höört to dat Kaspel von de Peter-un-Paul-Kark in Bewick.

För de Kathoolschen is de Marien-Kark in Lümborg tostännig.

Weertschop un Infrastruktur

För Brauk is de freewillige Füürwehr Bewick mit tostännig.

Verkehr

An Brauk langs löppt de Kreisstraat 42, de in’n Noordwesten över Radbrouk na Luhdörp bi Winsen geiht un in’n Süüdoosten in Bewick in de K 32 münnt. De K 32 wedder föhrt in’n Noordoosten na dat Zentrum von Bewick un in’n Süüdwesten na Vögelsen.

De nächste Autobahn is de Autobahn 39 (Afsnidd Hamborg–Lümborg), de direkt bi Brauk langslöppt. De Opfohrt 5 Handörp von de Bundsstraat 404 op de A 39 liggt direkt bi’n Oort. Op de B 404 kummt een von Brauk aver nich direkt rop. Dorüm is de Opfohrt 6 Lümborg-Noord op de A 39 söven Kilometer in’n Süüdoosten von Brauk an de K 46 dichter bi as de Opfohrt 5.

De nächste Bahnhoff is so bi veer Kilometer wied weg in’n Süüdoosten de Bahnhoff Bewick an de Bahnlien Hamborg–Hannover.

Scholen

De Kinner ut Brauk gaht na de Grundschool Bewick.