Bremervörder Zeitung

De Bremervörder Zeitung is en regional Daagbladd, dat jede Week von Maandag bet Sünnavend in de Stadt Bremervöör, de Gemeen Gnarrenborg un in de Samtgemenen Sürsen un Geestborn rutkummt. De Redakschoon sitt in Bremervöör in de Marktstraat 30. Dat Bladd hett en verköffte Oplaag von 6781 Stück. Chefredaktör is Rolf Borgardt un Rutgever de Verlagssellschop Borgardt, bi de ok een Maal in de Week de Anzeigenbläder Rundschau (sied 1980 jeden Middweken) un Sonntagsjournal (sied Februar 2000 jeden Sünndag) rutkaamt. De överregionale Mantel kummt von de Redakschoonsgemeenschop Noordsee von de Nordsee-Zeitung in Bremerhoben. De ZDB-ID is 824630-0.

Geschicht

Dat Daagbladd is an’n 24. September 1853 as Anzeiger für den Amtsgerichtsbezirk Bremervörde toeerst rutkamen, nadem Anton Peters ut Koblenz sien Druckeree in Bremervöör opmaakt hett. An’n 31. Dezember 1853 keem denn de erste Utgaav von’t Wochenblatt für die Amtsgerichtsbezirke Bremervörde, Beverstedt und Zeven. In’n Januar 1855 hett dat Bladd denn den Naam Wochenblatt und Anzeiger für die Stadt und das Amt Bremervörde, sowie die Aemter Beverstedt und Zeven kregen. Al an’n 7. Juli 1855 keem denn de nächste Naam: Bremervörder Wochenblatt un von’n 2. April 1856 af an hett dat Bremervörder Volks-Bote heten. Von’n 4. Januar 1857 af an weer de Naam Hannoverscher Volks-Bote. Von 1879 af an keem dat Bladd dree Maal in de Week rut.

1894 blifft de Grünner Anton Peters dood un sien twee Söhns August un Theodor övernehmt Verlag un Druckeree. 1910 blifft ok August dood. Theodor Peters föhrt dat Ünnernehmen denn alleen, mutt dat aver 1911 verköpen. De Köper is Bernhard Borgardt, de al de Neuhaus-Ostener Zeitung mit rutbröcht hett. Ünner sien Leid keem de hüdige Naam Bremervörder Zeitung (an’n 1. März 1911) un dat Bladd is denn jümmer maandags bet sünnavends rutkamen.

An’n 1. Oktober 1933 hett de NSDAP en Regional-Utgaav von dat Parteibladd Hamburger Tageblatt ünner den Titel Bremervörder Tageblatt rutbröcht. An’n 1. März 1934 warrt Borgardt dwungen, dat he de Bremervörder Zeitung nich mehr rutbringt. In sien Druckeree schall nu dat Bremervörder Tageblatt druckt warrn. Aver dat Tageblatt verköfft sik nich good un so kummt dat, dat an’n 28. Februar 1935 dat Bremervörder Tageblatt opgeven warrt un Borgardt doch wedder de Bremervörder Zeitung rutgeven dröff. Borgardt mutt dat Verlagsrecht denn aver an siene beiden Söhns afgeven.

Von’n 3. Mai 1943 af an keem dat Bladd denn nich mehr egenstännig rut un is bi de Zevener Zeitung druckt worrn. 1945 warrt Borgardt drapen, as de Düütschen de al von de Briten innahmen Stadt Bremervöör bescheten doot, un blifft dood. Siene beiden Söhns Bernhard un Jürgen övernehmt dat Ünnernehmen denn ganz. Nadem de britsche Stadtkummandant in Bremervöör vörielig tostimmt hett, is de Bremervörder Zeitung al an’n Freedag, 22. Juni 1945, dat eerste Maal na’n Tweten Weltkrieg wedder rutkamen. Dat weer dat eerste Daagbladd in de westlichen Besatzungsrebeden na’n Krieg. Aver bevör de nächste Utgaav an’n Maandag, 25. Juni 1945, rutkamen is, hett dat britsche Hauptquarteer in Hamborg de Genehmigung wedder trüggtagen. Bet 1949 harr de Verlag keen Lizenz. In disse Tied hett dat in Bremervöör en Lokalutgaav von de Lüneburger Landeszeitung geven. De Druckeree hett in disse Tied aver en Anzeigenbladd rutbröcht, in dat ünner annern amtliche Bekanntmachungen und Familienanzeigen to lesen weren. Nadem de Dwang to en Lizenz 1949 wegfullen is, is de Bremervörder Zeitung an’n 1. Oktober 1949 wedder rutkamen. Tohoop mit annere Verlääg langs de Elv grünnt dat Bladd de Norddeutsche Allgemeine as Mantelredakschoon för överregionale Narichten. De hüdige Redakschoonsgemeenschop Noordsee is denn 1972 kamen. In dat Johr hett dat ok ophöört, dat dat Bladd in Bremervöör druckt worrn is. Dat is denn in Bremerhoben druckt worrn un dat weer ok de Grund, dat dat Bladd nu von dat Berliner op dat Rheinische Format wesselt is.

1992 ännert sik denn wedder de Druckoort un dat Bladd warrt in Stood druckt. Dat kummt sietdem as Morgenbladd rut. Siet Januar 2012 warrt dat Bladd in dat Druckzentrum Nordsee in Bremerhoben druckt.

Literatur

• 75 Jahre Bremervörder Zeitung. Jubiläumsausgabe Bremervörder Zeitung den 3. Oktober 1928. Bernh. Borgardt 1928
• 125 Jahre Bremervörder Zeitung, Bruunswiek 1978

Weblenken

• Websteed von de Bremervörder Zeitung (hoochdüütsch)