Brendan Perry

britischen Musiker, Singer un Multi-Instrumentalist

Brendan Michael Perry (* 30. Juni 1959 in Whitechapel, London) is en britischen Musiker, Singer un Multi-Instrumentalist. Tosamen mit Lisa Gerrard billt he dat Duo Dead Can Dance.

Brendan Perry, 2010

Loopbahn ännern

Bekannt is Perry vundaag vör allem för sien liese, multi-ethnische Musik, de he mit Dead Can Dance maakt hett. Anfungen hett he sien Loopbahn as Musiker aver in en anner’t Genre. As Kind is he mit sien Öllern na Auckland, Neeseeland utwannert, woneem he sik sülvst dat Gitarrspelen bibröcht hett. In’t Johr 1977 is Perry Liddmaat vun de neeseelännschen Punk-Grupp The Scavengers worrn, in de he ünner annern ünner dat Pseudonym Ronnie Recent optreden is. To Anfang speel Perry den Bass, övernahm den Johr dorna aver dat Singen, nadem de vörige Frontmann de Grupp verlaten hett.

In’t Johr 1979 is de hele Grupp na Melbourne togen un hett sik mit The Marching Girls en ne’en Naam geven. Twee Johren later is Perry sülvst ut de Grupp rutgahn, üm mit Lisa Gerrard, Simon Monroe un Paul Erikson de Grupp Dead Can Dance to grünnen. Man een Johr nadem se na London ümtogen sünd, weern blots noch Perry un Gerrard över. Op dat Label „4AD“ vun Ivo Watts hebbt de beiden Musikers mit wesseln Kollegen bit to’t Enn vun jemehr Tosamenarbeit in’t Johr 1998 alltohopen acht Albums opnahmen.

Een Johr later hett Perry sien Solo-Album Eye of the Hunter rutbröcht, dat blangen egene Leder ok en Coverfaten vun Tim Buckley sien Stück I Must Have Been Blind bargt. Mit de Tiet hett Perry ok an en reeg vun Kompilatschonen mitarbeit, för de he ünner annern ok wietere Stücken vun Buckley covert hett, as Happy Time un Dream Letter.

Vundaag leevt Perry in Irland, woneem he Baas vun en Samba-School (Quivvy School of Samba) is un af un to Workshop för Percussions in’t olle Studio vun Dead Can Dance. 2005 hebbt sik Perry und Gerard noch mol tosamen doon för twee Tourneen dör Europa un Noordamerika. Ok 2013 gaht se wedder tosamen op Tour un speelt denn ok in Düütschland.

2008 hett sik Perry vun dat Label 4AD afwennt. 2010 güng he op en Tour dör Europa un – tosamen mit Peter Murphy – Süüdamerika. Dat glieke Johr noch keem sien tweet Solo-Album Ark op’n Markt.

Diskografie as Solokünstler ännern

Weblenken ännern

  Brendan Perry. Mehr Biller, Videos oder Audiodateien to’t Thema gifft dat bi Wikimedia Commons.