CA-14
De CA-14 is en 127 Kilometer lange Straat, de to dat Stratennett von de Rutas Centroamericanas tohöört un dör Guatemala föhrt.
Verloop
ännernDe Straat nimmt ehren Anfang in de Stadt Cobán (Departamento Alta Verapaz) an de Ruta Nacional 5 (RN-5). Von dor föhrt se toeerst na Süden na Santa Cruz Verapaz (anbunnen an de RN-7W) un Najquitob. Dor wennt de Straat sik na Oosten un löppt na Tactic un San Julián (anbunnen an de RN-7E), wo se sik na Süüdoosten wennt, na dat Departamento Baja Verapaz un na Pasmolón. Von Cobán bet hierher is de Straat groff jümmer den Río Cahabón folgt. De Straat geiht nu an de Quebrada de Chicoy un de Quebrada La Cruz langs na’n Oort Purulhá. Dor geiht de Straat över en üm un bi 1700 Meter hogen Pass in dat Daal von’n Río Las Flautas. De nächsten Öörd sünd denn La Unión Barrios, Niño Perdido, Matanzas un Santa Bárbara. In La Cumbre (bi San Jerónimo) münnt de RN-17, de von Salamá kummt, in de CA-14. Nu stiggt de Straat hoog un geiht över en Pass över en Bargrügg von de Sierra de Las Minas röver. De Pass is ok de Grenz na dat Departamento El Progeso. Von dor föhrt de Straat in dat Daal von’n Río Motagua, vörbi an Marajuma un San Esteban. Bi El Rancho münnt de CA-14 denn in de CA-9.
