Cadillac Man
| Filmdaten | |
|---|---|
| Plattdüütsch Titel: | — |
| Originaltitel: | Cadillac Man |
| Düütsch Titel: | Cadillac Man |
| Produkschoonsland: | USA |
| Johr vun’t Rutkamen: | 1990 |
| Läng: | 97 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Roger Donaldson |
| Dreihbook: | Ken Friedman |
| Produkschoon: | Roger Donaldson Charles Roven |
| Musik: | J. Peter Robinson |
| Kamera: | David Gribble |
| Snitt: | Richard Francis-Bruce |
| Szenenbild: | Gene Rudolf |
| Kledaasch: | Deborah Kramer |
| Dorstellers | |
| |
Cadillac Man (op plattdüütsch so veel as „Cadillac-Mann“) is de Titel vun en US-amerikaansche Krimikummedie ut dat Johr 1990, bi de Robin Williams un Tim Robbins de Hööftrullen speelt hebbt. Speelbaas weer Roger Donaldson, de ok as Produzent bedeeligt weer.
De Film keem an’n 28. Mai 1990 in de US-amerikaanschen Kinos un hett dor 27,6 Millionen US-Dollar inspeelt.[1] In Düütschland is de Film an’n 20. September 1990 anlopen un hett alltohopen 113.403 Tokiekers in de Kinos hatt.[2]
Inholt ännern
Joey O’Brien is en Autoverköper, de dor ok nix nafraagt, wenn dat dorüm geiht, en Weetfro op’n Weg na’t Gräffnis en nee Auto antodreihn. He arbeit in’t Autohuus Turgeon, dat blangen en poor Ümstruktureren na mehr as 35 Johren ümtehn deit. Ut dissen Grund gifft dat dor an’n Sünndag en Sünnerverkoop, bi den Joey tomindst twölf Fohrtüüch verköpen mutt, üm sien Arbeit nich to verleren. Dat will Joey op jeden Fall hinnern, vunwegen dat je jüst mit 20.000 US-Dollar bi Tony in de Kried steiht, sien Leefste Joy Munchak mit Luxus tofreden stellen will as ok Ünnerholt för sien Ex-Fro Tina un sien Dochter Lisa betahlen mutt. Blots twee Minschen maakt em to Tiet keen Lasten: sien Mudder un sien annere Leefste Lila, de Mooddesignersche warrn will.
De Sünndag fangt an sik goot an, man dat blifft nich lang so. Toeerst kummt Joy mit ehrn Ehmann Harry, denn warrt Joey vun sien Ex gewohr, dat sien Dochter Lisa verswunnen is. Bito mutt he bit to dree Kunnen gliektietig bedenen. Man dormit nich noog: Opletzt föhrt Larry mit sien Motorrad, Sprengstoff un en AK-47 in dat Autohuus un nimmt all Lüüd, de in’n Laden sünd, as Börgen. Sien Plaan is ruttofinnen, wokeen op Arbeit mit sien Fro Donna in’t Bett geiht. Dat is Jack, Joey sien Baas, de gau versöcht uttoneihn. Man, Larry is so in de Brass, dat he wild üm sik scheten deit, dat nümms weglopen kann. Unvermodens seggt Joey em aver to, dat he de eenzige is, de mit Donna wat hett. Dorüm sleiht he vör, dat doch all annern gahn künnen, vördem de Polizei kamen deit.
Man, de Polizei is gau dor un regelt dat hele Rebeet vun de Firma af. Joey markt, dat Larry bannig ünner Stress steiht, un schalt sik as Vermiddler in. Dordör warrt he aver ok in’t Feernsehn wiest, so dat sien Ex-Fro Tina, un sien beiden Leefsten Joy un Lila vun’anner gewohr warrt. Larry un Joey frünnt sik in de sünneren Situatschoon mit’nanner an, so dat Joey sien Talent as Verköper dorto insetten deit, üm Larry en möögliche Lösung smackhaft to maken: He schall all Börgen freelaten un sik de Polizei stellen, üm later dorop verhanneln to künnen, dat he nich torekensfähig weer. Opletzt seggt Larry na veel Tosnacken to, stellt aver en Bedingen, dat he tomindst as Mann opgeven will un nich as’n Waschlappen. He will dorüm mit Joey as Börg rutgahn, warrt denn aver anschaten un dorna in en Krankenhuus bröcht. Joey warrt dorgegen as Held vun’n Dag fiert, de op eenmol all sien finanziellen Nööt los is un ok sien Arbeit behollen dröff. Mabn, egentlich intresseert Joey dat gor nich mehr so recht, vunwegen dat he blots noch sien Ex-Fro Tina söcht, üm bi ehr en tweete Chance to kriegen. Wohrhaftig stellt Tina em so was in Utsicht, so dat Joey tofreden na Huus in’n Fieravend föhren – man, nich ahn vörher to versöken den Polizist, de üm de Börgen verhannelt hett, en Auto to verköpen.
Kritik ännern
- Owen Gleiberman meen in Entertainment Weekly, dat de Film man middelmatig to’n Smustern weer.[3]
- Dat Lexikon vun’n internatschonalen Film beteken de Film as en furios inszeneerte Kummedie mit Hööftdorstellers, de wunnerbor spelen deen. Dat deelwies hoge Tempo weer dör klook utwählte Nevenschauplätz noch antogen.[4]
Borns ännern
- ↑ Cadillac Man (1990) op boxofficemojo.com (engelsch), afropen an’n 12. März 2012
- ↑ TOP 100 DEUTSCHLAND 1990 op insidekino.de, afropen an’n 12. März 2012
- ↑ Owen Gleiberman: Cadillac Man (1990) op ew.com vun’n 25. Mai 1990 (engelsch), afropen an’n 13. März 2012
- ↑ Filmkritik in’t Lexikon vun’n internatschonalen Film (hoochdüütsch), afropen an’n 26. August 2014
Weblenken ännern
- Cadillac Man in de Internet Movie Database (engelsch)
- Kritiken to’n Film op Rotten Tomatoes