Cardhu
Cardhu [kaɾˈdu] (fröher: Cardow) is en Whisky-Brenneree bi Cardow, Knockando, Banffshire, Schottland, de in’n Besitt vun den Spirituosenkunzern Diageo is.
| Cardhu | |
|---|---|
 Brenneree Cardhu | |
| Land | Schottland |
| Region | Speyside |
| Tyyp | Malt |
| Status | aktiv |
| Besitter | Diageo |
| Grünnt | 1824 |
| Grünner | John und Helen Cumming |
| Waterborn | Lyne Burn |
| Washstill(s) | 3 |
| Spiritstill(s) | 3 |
| Produkschoonsvolumen | 2.300.000 l |
Historie ännern
De Brenneree weer 1824 vun John un Helen Cumming ünner den Naam Cardow grünnt, nadem aver al siet 1811 op de Cardow-Farm an’n Mannoch Hill Whisky brennt worrn is. De Brenneree weer noch teemlich lütt, un so künn blots in lütte Mengden produzeert warrn. Elizabeth Cumming, jemehr Dochter, hett in de 1880er Johren en Stück Land in de Neeg köfft un de Destille nee boen laten. De Brennblasen un annere Reedschoppen weern an William Grant verköfft, de dormols jüst de Glenfiddich-Destille boen laten hett. 1893 weer de Brenneree an John Walker & Sons Ltd. verköfft, de 1899 de Tall vun de Brennblasen vergröttern laten hebbt.
Twüschen 1917 un 1919 weer de Brenneree op Anwiesen vun de Regeren dicht maakt, vunwegen dat de Gastenbestand schoont warrn müss. In’t Johr 1925 is John Walker & Sons Ltd. un dormit ok de Cardow-Brenneree vun de Distillers Company Limited (DCL) övernahmen worrn. Vun 1960 an weer de Brenneree vun Grund op moderniseert. Dorbi sünd na un na de ollen Anlagen gegen ne’e uttuuscht worrn un de Tall vun de Brennblasen weer op söss opstockt. Eerst 1983 weer de Brenneree op Cardhu (schottsch-gäälsch för „Swart Fels“) ümnöömt. 1987 is de Brenneree vun Diageo övernahmen worrn, de een Johr later en Besökerzentrum apen maakt hebbt.
Produkschoon ännern
Cardhu höört to dat schottische Whiskyrebeet Speyside. Se nimmt dat Water för de Produkschoon ut den Lyne Burn un Borns vun’n Mannoch Hill. In de Brenneree gifft dat en Meeschfatt (mash tun) vun 7,2 t un acht Gäärfatten (wash backs) vun tosamen 296.000 l. Brennt warrt in dree wash stills vun tosamen 36.000 l un dree spirit stills vun tosamen 31.500 l, de mit Damp hitt maakt warrt.
En groten Deel vun de Produkschoon warrt to’n Mischen vun Blend bruukt. He is en wichtigen Bestanddeel vun den Johnnie Walker. Vun Cardhu warrt aver ok verschedene Single Malts op’n Markt anboden. De 12-johrige Affüllen vun Cardhu höört siet 2008 to de Reeg vun de Classic Malts vun Diageo.
Kiek ok ännern
Literatur ännern
- Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
- Walter Schobert: Das Whiskylexikon. Fischer Taschenbuch Verlag, Frankfort an’n Main, 2003, ISBN 978-3-596-15868-3.
Weblenken ännern
- Cardhu op discovering-distilleries.com
Koordinaten:57° 28′ N, 3° 21′ W