Carl Christoph Niemeyer
Carl Christoph Niemeyer (* 20. September 1773 in Wölpe; † 19. November 1857 in Hannover) weer en düütschen Verwaltungsbeamten.
Niemeyer is 1773 as Söhn von Elisabeth Benedicte, borene Schuster (13. Januar 1742–20. November 1827; Dochter von Heinrich Rudolf Schuster), un den Amtmann Johann Christian Niemeyer (15. Mai 1724–28. Februar 1811) in Wölpe boren.[1] He keem 1788 op dat Lyceum Hannover un hett sik an’n 7. Juni 1791 för en Studium von de Juristeree an de Universität Göttingen inschreven.[1] Na dat Studium güng he in’n kurhannöverschen Verwaltungsdeenst un is 1794 Amtsauditer in dat Amt Calenberg un 1796 in dat Amt Koldingen worrn.[1] Dor is he 1797 to’n Amtsschriever opstegen.[1] 1801 keem he as Amtsschriever in dat Amt Oosterholt, 1805 in dat Amt Herzberg un 1806 in dat Amt Zeven.[1] Nadem dat Amt Zeven 1810 Deel von dat Königriek Westfalen worrn is (Franzosentied), weer Niemeyer Fredensrichter.[1] Na de Franzosentied is he 1816 Amtsassesser bi dat Amt Zeven worrn un dor 1818 Titulär-Amtmann.[1] 1823 keem he as Amtmann in dat Amt Heien un is von dor 1832 na dat Amt Sieenborg wesselt.[1] In’n Rang von en Oberamtmann is he 1839 opstegen.[1] 1844 harr he sien 50. Deenstjubiläum un is bi disse Gelegenheit von de Universität Göttingen to’n Ehrendokter maakt worrn.[1] Niemeyer is 1845 denn in Rohstand gahn un hett in de Vörstadt von Hannover leevt.[1]
Niemeyer weer nich verheiraadt.[1] He is 1857 doodbleven un op’n Goornkarkhoff Hannover begraven worrn.[1]
