Carlos Grethe
Carlos (Carl) Conrad Grethe (* 25. September 1864 in Montevideo, Uruguay; † 2. Februar 1913 in Nieuwpoort, Belgien) weer en Maler un Perfesser an de Kunstakedemie.
Grethe is 1864 in Montevideo boren. In en Öller von fiev Johr is he mit sien Familie na Hamborg tagen. He hett eerst en Lehr as Dekoratschoonsmaler maakt un denn an de Kunstgewarfschool bi Paul Düyffcke, an de Karlsruher Kunstakademie (1882–1884 un 1889–1890) un de Pariser Académie Julian (1884–1886) studeert. Dat Studium hett he för en Seereis von meist een Johr na Mexiko (1888–1889) ünnerbraken. Na disse Tied weer he Lehrer an de Karlsruher Kunstgewarfschool un an de Akademie dor. He is 1899 an de Königliche Akademie von de bildenden Künste in Stuttgart beropen worrn un bet to sien fröhen Dood Kunstlehrer bleven.
Grethe weer von 1894 af an Maat von de Münchner Secession. He hett 1896 den Karlsruher Künstlerbund mit grünnt, aver ok den Stuttgarter Künstlerbund, 1901 de Königliche Lehr- un Versöökswarksteed (1901) un den Vereen Württembergische Kunstfreunde.
He weer üm de Johrhunnertwenn en wichtigen Vertreder von de Maleree bi de Themen Minsch un See un Küst un Havens. To Anfang hett he vör allen to’n modernen Realismus hollen un is later mehr to’n Impressionismus wesselt.
In de Johren 1894 bet 1897 weer he mit siene Familie un Schölers (ünner annern Hermann Daur) den Sommer över för Studien jümmer in Duhnen. In Duhnen is vondaag de Carlos-Grethe-Weg na em nöömt.
Literatur
ännern- Ingrun Stocke: Carlos Grethe: der Maler des Meeres. 1864 - 1913. Leben und Werk. VDG Weimar, Kromsdorf 2008, ISBN 978-3-89739-602-9
