Carlos Veiga

Carlos Alberto Wahnon de Carvalho Veiga (* 21. Oktober 1949 in Mindelo) is en Politiker vun Kap Verde. He weer vun 1991 bit 2000 Premierminister vun’t Land.

Fröhe Johren

Veiga is op’t Eiland São Vicente boren worrn. As he de School afslaten harr, is he na Lissabon gahn, un hett dor Rechtswetenschoppen studeert. In’t Johr 1971 hett he sien Dokter maakt. Dorna hett he vun 1972 bit 1974 in Angola in de Verwalten arbeit, wat to de Tiet to Portugal hören de. As sien Heimatland 1975 unafhangig worrn is, is he dorhen torüch gahn un hett as Staatsafkaat arbeit. Man, Mucken mit de dormaligen Eenheitspartei Partido Africano da Independência de Cabo Verde (PAICV) hebbt em dorto bröcht, ut’n Staatsdeenst uttoscheden un as eenfachen Afkaat to arbeiten. 1985 un 1988 is he in dat Parlament wählt worrn, un 1990 grünn he denn de Oppostischoonspartei MpD.

Politische Loopbahn

Na’t Inföhren vun de Demokratie in Kap Verde, hett sien Partei an’n 13. Januar 1991 de Parlamentswahlen gegen de bit dorhen eenzige regeren Partei PAICV wunnen. An’n 4. April 1991 is he Premierminister worrn. In de Tiet vun sien Regeeren hett he Kap Verde, wat bit dorhen sozialistisch regeert weer, in Richt na de Marktweertschop. 1995 is he wedderwählt worrn. In’n September 1998 weer he an Boord vun en Fleger, de bi Storm nootlannen müss, wat he mit lichte Besehren överstahn hett. Veiga is an’n 29. Juli 2000 torüchpeddt, vun wegen dat he sik 2001 för’t Amt vun’n Präsidenten bewarven wull.

Bi de Präsidentschopswahlen keem he aver in’n tweeten Wahlgang nich gegen Pedro Pires an, de sien Vörgänger as Baas vun de Regeeren weer. He is teihnmol gegen dat Wahlresultat angahn, Pires tweemol. Korte Tiet later hett Veiga dat Resultat aver annahmen. Bi de Präsidentschopswahlen 2006 hett he sik nochmol gegen Pires opstellen laten, kreeg aver wedder nich noog Stimmen.

Weblinks

De BBC to de Wahlen 2001, 6. März 2001 (engelsch)
Kortbiografie (engelsch)