Charlamowsky

Charlamowsky is en Sort vun’n Huusappel (Malus domestica), de as’n Tofallssamling ut Russland stammt un al üm 1830 to’n eersten mol in Stuttgart-Hohenheim anplant worrn is. De Sort Charlamowsky is ok ünner de Naams Borowitzky oder Duchess of Oldenburg bekannt.

Appel vun de Sort Charlamowsky

De Boom sülvst wasst ahn grote Anspröök un kummt op meist all Boddens goot togang, mit Utnahm vun Öörd, de natt un koolt sünd. He driggt jeed Johr vele Appels. De jungen Bööm vun disse Sort wasst to Anfang teemlich gau, dorna warrt dat Wassdom langsomer un de Boom warrt ok gauer oolt. För en go’e Büüt ios dorüm en regelmatigen Snitt nödig. De robuste Sort is wegen de fröhen Riep un dat swacken Wassdom ok för Huusgoorns egent.

De Frucht hett en gladde, feine Sluut, de an’n Boom gröölich-geel is, un bi Lagerriep mewist goldgeel warrt. Op de Sünnsiet wiest de Sluut rode Striepens oder is root flammt. Dat Fruchtfleesch is vun helle, geelwitte Klöör, möör un saftig. Üm de Fattbünnels is dat Fleesch mitünner ok licht root. De Smack is wenig aromaatsch un eher süerlich. De Röök is swack aver leeftallig. Riep sünd de Appels in’n August, se hollt sik aver blots veer Weken.

De Frücht warrt wegen den süerlichen Smack weniger as Tafelaaft, man eher to’n Verarbeiten bruukt, to’n Bispeel för Appelkoken oder för Appelmoos.

Kiek okÄnnern

LiteraturÄnnern

  • Walter Hartmann (Rgv.): Farbatlas Obstsorten, Ulmer Verlag, Stuttgart 2003, 2. Oplaag, ISBN 3-8001-4394-1.

WeblenkenÄnnern