Tofallssamling

Tofallssamling is de Beteken för en Plantensort, de nich mit Afsicht tücht worrn is, man as Nakamen vun tofällig opdeckten Plantenpopulatschonen tostannen kamen sünd un sinnvull Egenschoppen opwiesen doot. De övten Oogen vun'n Goorner oder Tüchter kennt den Weert vun solke Opdecken un vermehrt den Samling denn oder nütt em för egen Tüchten.

Wieldat vele Aaftsorten teemlich heterozygote Klonen sünd, künnt sik bi fre'e Krüüzen in de Natur düchtig ünnerscheedlich Nakamen togang kamen, de blots dör en bannig tietopwännigen un nich sünnes weertschopplichen Vörgang utsorteert warrn künnt. Ut den Grund gifft dat blots hööchst wenig staatliche Instituten oder private Goornfrünnen, de sowat maakt hebbt un maakt. Tofallssamlingen, de dör'n Tofall in Goorns oder an'n Stratenrand funnen warrt, speelt dorüm ok vundaag noch en grote Rull bi't Entwickeln vun ne'e Sorten. So weer as een Bispeel de vergliekswies ne'e Appelsort Braeburn vun en Aaftbuern in Niegseeland enerworrns an'n Wegrand funnen. Un ok de bekannte Sort Golden Delicious, de för de meisten Lüüd as de Begreep slechthen för de hoochtüchten Massenappelsorten gellt, is as en Tofallsamling in een Goorn opdeckt worrn.

Bi de Rosen kummt een Togfallssamling grote Bedüden in de Rosenhistorie to. De eersten avendlännschen Teerosen sünd ut Noisetterosen un de Rosa gigantea entstahn, weern aver vun wegen jemehr Unfruchtborkeit nich för de wietere Tucht egent. Eerst dör den Tofallssamling Devoniensis is dat mööglich worrn, wietere Sorten to tüchten.

En poor Tofallsamlingen, de sik jemehrn Naam maakt hebbt sünd: Phlox ‚Blue Paradise‘, Pelargonium ‚P.Mabel Grey‘, Betula pendula Dalecarlica usw.