Charles Aznavour

Charles Aznavour ( anhören ^D; eegentlich Schahnur Waghinak Asnawurjan, armeensch Շահնուր Վաղինակ Ազնավուրյան / Šahnowr Vałinak Aznavowryan, ok Charles Aznavourian; * 22. Mai 1924 in Paris, Frankriek; † 1. Oktober 2018 in Mouriès, Bouches-du-Rhône, Frankriek) weer en armeensch-franzöösch Chansonnier, Leedtexter, Komponist un Filmschauspeler. Dorneben weer he armeensch Botschaper in de Swiez un bi de Vereente Natschonen in Genf.

Charles Aznavour 1999 in Cannes

Leven

Aznavour hörrt siet över en halv Johrhunnert to de rutragend Persönlichkeiten vun den franzööschen Chanson. He harr sien Dörbröök 1946, as Édith Piaf up hüm upmarksom wurr un hüm up en Tournee dör Frankriek un de USA mitnehm. Charles Aznavour hett över dusend Chansons schreven un de in fiev Spraken, dorünner ok Düütsch, in de Överdragen vun Ernst Bader, Walter Brandin, Michael Kunze un Jacky Dreksler, interpreteert. De düütsch sungen CD „Das Beste auf Deutsch“ keem 2004 bi dat Label EMI herut. In de Loop vun de Johren sünd över hunnert Schallplatten entstahn. He gellt as de internatschonal bekannst franzöösch Singer.

De Texten vun sien Leeder behanneln faken de Leev. Eenig vun sien bekanntesten Chansons sünd La Bohème, La Mamma, Que c’est triste Venise, She, Mourir d’aimer, Paris au mois d’août, Je m’voyais déjà, Les Comédiens, Tu t’laisses aller, Emmenez-moi, Comme ils disent, Pour faire une jam.

As Schauspeler hett Aznavour in över 70 Filmen mitwarkt, ünner annern 1979 in de Oscar-prämeert Film Die Blechtrommel vun Volker Schlöndorff un 2002 in Atom Egoyan sien Reflexion över Künstler, Erinnerung un de armeensch Historie Ararat. 2006 weer he in sien bitlang letzt Rull to sehn: The Colonel. In en Interview mit de FAZ geev he 2008 an, dat he kien wiedere Filme mehr dreihn wull.

An' 20. Februar 2006 gung sien internatschonaal Afscheedstournee in Essen to Enn', dat gull as sien letzt apenlich Konzert överhoopt. Aznavour harr aber all mehrfack Afscheedskonzerte geven un so bleev ok dat Konzert in Essen nich dat letzte. In' September 2006 hett he en Noordamerika-Tournee anfungen, in' November 2007 is he in dat Pariser Palais des Congrès uptreden. In' Fröhjahr 2008 geev he in Montréal en wiederes Konzert. Up de Bühne kunn he bit toletzt mit körperlich Fitness un grandioos Stimm vör immer utverköfft Hüüs övertüügen, wobi he ahn Teleprompter oder annner Hülpsmiddel uptreden deiht un faken in mehreren Spraaken singt. 2009 hett he mit den Arrangeur John Clayton tosommenarbeit, de sien Chansons nee arrangeeren un tosommen mit Aznavour un sien Clayton/Hamilton-Big Band nee upnehmen dee.

An' 30. September 2006 is Aznavour vör 50.000 Tokiekers up den Platz der Republik in de armeensch Hööftstadt Jerewan uptreden un hett sück ok up Armeensch an sien Publikum wendt. Anlaat weer de eerste Staatsbesöök vun en franzöösch Präsidenten in de Republik Armenien. Aznavour tellt to de prominentst Armeniers weltwiet un hett sück vör allen siet dat verheerend Eerdbeven dor 1988 immer weer för dat Land insett. In' Dezember 2008 wurr Aznavour, de ok Vertreder vun Armenien bi de UNICEF is, de armeansch Staatsbörgerschap verlehnt.

Siet Juni 2009 is Aznavour in Genf armeensch Botschaper in de Swiez. Todem vertrett he sien Land an de Genfer Stäe vun de Vereente Natschonen.

An' 7. Oktober 2011 wurr in Jerevan in sien Gegenwart as ok de vun den franzöösch un den armeensch Präsidenten en nah hüm nömmt Kulturzentrum apenmakt.

Privat

Aznavour weer mehrere Malen verheiraadt: 1946 hett he Micheline Rugel heiraadt, een Johr later wurr de Dochter Séda boren, de ok Singerin wurrn is. 1952 keem sien Söhn Charles up de Welt. 1955 hett Aznavour Evelyne Plessis heiraadt, de Ehe hull bit 1960. Ut disse Verbinnen gung de Söhn Patrick (* 1956) hervör. An’ 11. Januar 1967 hett Aznavour Ulla Ingegerd Thorssell ut Sweden heiraadt. An’ 12. Januar 1968 wurrn se vun den armeenschen Arzbischop in Paris ok nah Karkenrecht traut. Mit hör hett de Künstler dree wiedere Kinner: Katia (* 1969), Mischa Lev (* 1971) un Nicolas (* 1977).

Filmografie (Utwahl)

Johr	Titel	Synchroonsnacker
1946	Adieu chérie dt.: Adieu, Cherie
1957	Une gosse sensass’
1959	Les dragueurs dt.: Die nach Liebe hungern
1960	Un taxi pour Tobrouk dt.: Taxi nach Tobruk	Harry Wüstenhagen
1960	Le passage du Rhin dt.: Jenseits des Rhein	Herbert Stass
1960	Tirez sur le pianiste dt.: Schießen Sie auf den Pianisten!	Herbert Stass
1962	Horace 62
1963	Tempo di Roma
1965	La métamorphose des cloportes dt.: Ganoven rechnen ab	Michael Chevalier
1966	Paris au mois d’août dt.: Paris im Monat August
1968	Candy dt.: Sexy-Ladies
1969	The Adventurers dt.: Playboys und Abenteurer	Gerd Martienzen
1970	Le temps des loups dt.: Schüsse aus der Manteltasche	Michael Chevalier
1971	Un beau monstre dt.: Der letzte Tanz des blonden Teufels
1973	The Blockhouse dt.: Der Bunker	Fred Maire
1974	Ein Unbekannter rechnet ab	Gerd Martienzen
1976	Sky Riders dt.: Auf der Fährte des Adlers	Gerd Martienzen
1976	Folies bourgeoises dt.: Die verrückten Reichen	Erich Ebert
1982	Les fantômes du chapelier dt.: Die Fantome des Hutmachers	Harald Leipnitz
1983	Une jeunesse dt.: Das Geld bleibt unter uns
1984	Viva la vie! dt.: Viva la vie – Es lebe das Leben	Fred Maire
1986	Yiddish Connection
1988	Il maestro dt.: Das Geheimnis des Dirigenten	Fred Maire
1994	Un alibi en or, Feernsehn dt.: Das perfekte Alibi
1997	Le comédien
2001	Laguna
2002	Ararat
2006	Mon colonel dt.: Der Oberst und ich

Weblenken

Charles Aznavour. Mehr Biller, Videos oder Audiodateien to’t Thema gifft dat bi Wikimedia Commons.

• Charles Aznavour in de Internet Movie Database (engelsch)
• DNB-Katalog
• Diskographie mit all Upnahmen, de man so kriegen kann (franzöösch)
• Offiziell Webpräsenz vun Charles Aznavour (engelsch, franzöösch)
• Charles Aznavour - Armenian-Russian fan site
• „At 82, Charles Aznavour Is Singing a Farewell That Could Last for Years“, New York Times, 18. September 2006
• „Charles Aznavour auf Abschiedstournee. Frankreichs größter Chansonnier“, ARD, 10. Februar 2006
• Personennaamdatei