Chito Martínez (Baseballspeler)

Reyenaldo Ignacio „Chito“ Martínez (* 19. Dezember 1965 in Belize-Stadt) is en Baseballspeler ut Belize. He hett as Rightfielder speelt.

Martínez 1988 as Speler för de Memphis Chicks

Martínez is 1965 in Belize-Stadt boren un is later in de USA gahn. Siene School hett he an de Brother Martin High School in New Orleans afslaten.

An’n 4. Juni 1984 is he in de sösste Runn von’n Amateur Draft von de Kansas City Royals opnahmen worrn. He is denn in de Minor League 1984 bi de Eugene Emeralds, 1985 bi de Fort Myers Royals, 1986 bet 1987 bi de Memphis Chicks, 1987 för korte Tied bi de Omaha Royals, 1988 bet 1989 wedder bi de Memphis Chicks un 1990 wedder bi de Omaha Royals insett worrn, de all Affiliate-Verenen von de Kansas City Royals weren.

An’n 15. Oktober 1990 is Martínez von sien Verdrag freestellt worrn un hett denn an’n 16. November 1990 en Verdrag mit de Baltimore Orioles ünnertekent un dröff mit’n Vereen in de Major League spelen. He weer dormit de eerste Person ut Belize, de in de Major League speelt hett. Tosätzlich hett he 1991 un 1993 ok bi’n Affiliate-Vereen Rochester Red Wings speelt un 1993 fiev Spelen bi’n Affiliate Bowie Baysox maakt.

In siene eerste Saison bi de Orioles hett he 13 Home Runs maakt un siene Slugging Percentage leeg bi 0,514 bi 216 At-Bats. 1992 hett he swäcker speelt, so dat he 1993 blots noch in acht Spelen insett worrn is un denn ut de Major League utscheden is, as de Orioles em an’n 22. November 1993 von sien Verdrag freestellt hebbt. An’n 13. Dezember 1993 hett he en Verdrag mit de Minnesota Twins ünnerschreven.

Toletzt hett he 1994 bi de Columbus Clippers speelt un 1995 bi de Colorado Springs Sky Sox.

Martínez sien Söhn Drew Martínez speelt Baseball in de Minor League.