Christian Lodemann
Christian August Lodemann (* 13. Januar 1805 in Buxthu; † 1. Februar 1878 in Lingen) weer en düütschen Verwaltungsjurist un Parlamentarier.
Lodemann is 1805 in Buxthu as Söhn von’n Amtmann von dat Amt Oold- un Neeklooster, Ernst Christian Lodemann (1756/1757–27. November 1836), boren.[1] Later weer he op dat Gymnasium in Danzig un hett an de Universität Göttingen Juristeree studeert.[1] Na dat Studium is he in’n Staatsdeenst gahn un hett 1826 bi dat Amt Ilten as Auditer anfungen, wo sien Vader Amtmann weer.[1] Noch as Auditer is he in dat Amt Bordörp wesselt un dor denn na de Auditertied to’n Amtsassesser supernumerär opstegen. Von Bordörp is he üm 1832 rüm na de Landdrostie Lümborg gahn un weer dor toeerst Hülpsarbeider un later Regerungsraad. He is bet 1855/1856 in Lümborg bleven.
Lodemann weer von’n 27. Dezember 1848 bet to’n 26. Mai 1849 Afornten in de Frankforter Natschonaalversammlung för’n 13. Wahlkreis Hannover in Lümborg.[1] He hett in dat Parlament to kene Frakschoon tohöört. In’n 13. Wahlkreis Hannover hett he Carl Christoph Merkel as Afornten aflööst, de sülvs söss Maand vörher Georg Theodor Meyer aflööst harr.
1856 is he as Amtmann in dat Amt Lingen beropen worrn un gliektiedig Hoheitskommissar för dat Hertogdom Arenberg-Meppen worrn.[1] Dormit hett Lodemann den kommissarschen Amtmann Leopold Otto Christian Meyer aflööst. Tosätzlich weer he von 1867 bet to sien Dood 1878 Kreishauptmann von’n Stüürkreis Lingen. Na sien Dood is he von Carl Georg Lindemann aflööst worrn.[1]
1835 hett Lodemann Agnes Dorothea Elisabeth von Witzendorff (1815–1888) freet.