Christian Richard Bauer

Christian Richard Bauer (* 11. September 1984 in Hamborg) is en düütschen un nedderdüütschen Schauspeler un Singer.

Christian Richard Bauer 2015, Fotograf: Maurice Bender

Leven ännern

Bauer füng al as Kind bi de Volksspielbühne Rissen an un speel dor bet 2009 so üm un bi 30 Rullen. Vele Wiehnachtsmärken un plattdüütsche Kummedies, aver ok "Der Dieb, der nicht zu Schaden kam" vun Dario Fo, "Black Coffee" vun Agatha Christie, de Hamlet-Persiflage "Prinz von Dänemark" un twee plattdüütsche Musicals. Mit twölf Johr stünn he in sien eerste Hauptrull op de Bühn vun dat Hamborger Kellertheater.

Na sien Abitur studeer he eerst düütsche un nedderdüütsche Literatur un klassische Philologie, ehrdat he an de Schule für Schauspiel Hamburg dat Schauspeelstudium anfangen dä. Dor studeer he bi Lehrers as Michael Bogdanov, Jens Roth un Renate Bleibtreu. 2010 weer he mit de Schauspeelschool toenn un speel den Hans vun Wittenstein ut "Undine" vun Jean Giraudox an dat Theaterhaus in Hilmessen. Wieldes studeer he ok klassischen Musical-Gesang bi Stephan Drakulich an de Joop van den Ende Academy in Hamborg un klassischen Gesang bi Christian Halseband vun de Hoochschool Ossenbrügge. Tosamen mit den Hamborger Knabenchor stünn he in den Beiersdorf-Konzertsaal in Hamborg op de Bühn. Noch ehr he mit de Schauspeelschool toenn weer, wörr he an't Mekelborgsche Staatstheater in Swerin engageert. Siet 2011 speelt he nu an't Ohnsorg-Theater in Hamborg, neem he to'n Bispill mit Michael Bogdanov, Heidi Mahler un Joachim Bliese tosamen arbeiden dä. Bavento speel he in Bonn, Brunswiek un op Tourneen dör Düütschland un de Swiez. Blangen sien Arbeit as Schauspeler is he ok as Poppenspeler bi klassische Konzerten un en Oper för Kinner dorbi un översett Texten vun William Shakespeare in't Plattdüütsche.


Weblenken ännern