Christiane Lemke

Christiane Lemke (* 10. Oktober 1951 in Greundiek) is en düütsche Perfessersche för Politikwetenschoppen an de Universität Hannover.

Christiane Lemke

Lemke is 1951 in Greundiek boren. Se hett 1970 dat Abitur an de Vincent-Lübeck-School in Stood maakt un von 1970 bet 1975 Pädagogik, Soziologie un Politikwetenschop an de Fre’e Universität Berlin studeert. Se hett dat Studium as Diplom-Pädagogin afslaten. Ok ehr Dokterarbeid hett se an de Fre’e Universität Berlin schreven un is an’n 7. Juli 1978 Dr. phil. worrn. Na disse Tied weer se von 1978 bet 1987 wetenschopliche Assistentin in dat Zentralinstitut för sozialwetenschopliche Forschung an de Fre’e Universität Berlin. An’n 6. Dezember 1989 hett se de Habilitatschoon för de Politikwertenschoppen kregen. Von Januar 1988 bet August 1991 weer se över den Düütschen Akadeemschen Uttuuschdeenst an de Universität von North Carolina in Chapel Hill. Von 1991 bet 1992 weer se an de Universität Harvard un denn von 1992 bet 1996 Oberassistentin för Politikwetenschoppen an de Fre’e Universität Berlin. In disse Tied harr se Gastprofessuren an de Universitäten Leipzig (Sommersemester 1993) un Potsdam (Sommersemester 1995). Siet 1. September 1996 is se Perfessersche für Politikwetenschoppen an de Universität Hannover. Se sitt dor siet 2000 op’n Jean-Monnet-Lehrstohl för Europääsche Politikwetenschoppen (Jean Monnet Chair for European Political Science) un weer mehrmaals Gastperfessersche an de Universität Harvard (Vörjohr 2001), de Suffolk Universität in Boston (Vörjohr 2006) un de Universität von North Carolina in Chapel Hill (mehrmaals von 2008 af an).

To ehre Swoorpunkten höört:

• Internatschonale Politik un Vergliekende Politikwetenschop
• Politik un Sellschop von de USA
• Europääsche Integratschoon
• Transformatschoon in Oostmiddeleuropa
• Politikwetenschopliche Froon- un Geslechterforschung

Von’n 31. März 2006 bet 30. März 2007 weer Lemke Direktersche von’n Neddersassischen Landdag un hett dormit as eerste Fro in Düütschland dat Leid över de Verwaltung von en Landsparlament övernahmen. To’n 1. September 2010 hett se en Roop op’n Max-Weber-Lehrstohl för Düütschland- un Europastudien an de Universität New York annahmen. Se is dor bet 2014 bleven.

Publikatschonen

Monografien

• Die Ursachen des Umbruchs 1989: Politische Sozialisation in der ehemaligen DDR (Schriften des Zentralinstituts für Sozialwissenschaftliche Forschung der Freien Universität Berlin). Westdeutscher Verlag, 1991, ISBN 3-531-12232-0
• Internationale Beziehungen: Grundkonzepte, Theorien und Problemfelder. Oldenbourg, München/Wien 2000, ISBN 3-486238582

as Rutgever

• tohoop mit Gary Marks (Rutgevers): The Crisis of Socialism in Europe. Duke University Press, Durham 1992
• tohoop mit Virginia Penrose, Uta Ruppert (Rutgevers): Frauenbewegung und Frauenpolitik in Osteuropa (Reihe: Politik der Geschlechterverhältnisse"). Band 6, Campus-Verlag, Frankfort an’n Main/New York 1996, ISBN 3-593-35415-2
• tohoop mit Kathrin Braun, Gesine Fuchs (Rutgevers): Feministische Perspektiven der Politikwissenschaft. Oldenbourg, München/Wien 2000, ISBN 3486255304

Weblenken

• Websteed von Christiane Lemke (hoochdüütsch)