Christoph Friedrich Sarnighausen

Christoph Friedrich Sarnighausen (* 24. Oktober 1779; † 4. Juli 1834 in Mesborg) weer en düütschen Verwaltungsbeamten.

Sarnighausen is 1779 as Söhn von Regine Luise, borene Claasen (27. Oktober 1759-14. Mai 1831), un von’n Amtmann Ludwig Heinrich Sarnighausen (23. Februar 1747-25. Januar 1830) boren. He hett von 1798 bet 1801 an de Universität Göttingen Juristeree studeert. He weer Auditer bi de Ämter Loonborg un Staarbarg un is dor denn Amtsschriever worrn. Denn weer he as Amtsschriever bi de Ämter Stolzenau, Pattensen, Bennigsen un Horborg.

He weer toeerst Amtsassesser un later Amtmann von dat Amt Scharnbääk un denn, nadem sien Vader, de Amtmann von dat Amt Mesborg, doodbleven is, von 1831 bet to sien Dood 1834 Amtmann in Mesborg. Sarnighausen is 1834 in Mesborg doodbleven un dor denn ok begraven worrn.

He hett an’n 27. Oktober 1811 in Bennigsen Margaretha Christiane Dorette Antoinette Coss (5. Januar 1795-3. Dezember 1842) freet. Sarnighausen harr ölven Kinner.