Coelestin III.

Coelestin III., mit börgerlichen Namen Giacinto Bobone (ok: Jacinto Bobo, Hyacinto Bobo; * üm un bi 1106 in Rom; † 8. Januar 1198 ok dor) weer Paapst vun 30. März 1191 bit to sien Dood.

Leven

He weer en Schöler vun Petrus Abaelardus un hett hüm later henn tegen binnenkarlich Kritik an sien rationalistisch Denken verteedigt. 1144 wurr he Kardinaldiakon vun Santa Maria in Cosmedin, 1154-55 un 1172-74 is he as Legat nah Spanien reist.

As 85-johriger is he wohrschienlich as Kompromisskandidat to’n Paapst wählt wurrn. He weer domols all 46 Johr Kardinal, aber harr nie nich en Priesterweihe kregen, sonnern weer blots Diakon. Dorüm is he an’ 13. April 1191, to’n Priester un een Dag later, an Oostersönndag to’n Bischop weiht wurrn. Oostermaandag muss he nämlich all Heinrich VI. up de sien eerst Italientoog in Rom to’n Kaiser krönen. Tegen Heinrich harr he denn ok nich völ to melden. De hett hüm nah de Eroberung vun Sizilien un Neapel den Lehnseid verweigert. Eenzig den duersamen Anspruch up de Kaiserwürde för dat Huus Hohenstaufen kunn he opponeeren. Ok den Düütschen Oorden hett Coelestin anerkennt.

Enn’ 1197 versöch Coelestin freewillig aftotreden, um den Kardinal Giovanni di San Paolo, de Möglichkeet to geben, Paapst to wurrn, aber dat is vun de Oppositschoon in dat Kardinalskollegium aflehnt wurrn.

Vörgänger	Amt	Nafolger
Clemens III.	Paapst 1191 - 1198	Innozenz III.

Weblenken

• Indrag to de Person in dat Biograafsch-Bibliograafsch Karkenlexikon (hoochdüütsch)
• kathoolsche Enzyclopädie (engelsch)