Constant Troyon (* 28. August 1810 in Sèvres bi Paris; † 21. Februar 1865 in Paris) weer en franzöösch Landschaps- un Deertenmaler, de de School vun Barbizon torekent wurrd.

Constant Troyon in dat Johr 1865

Leven ännern

Troyon hett in jung Johren as Porzellanmaler in de beropen Manufaktur vun sien Heimatstadt, in de ok sien Vader tätig weer, arbeit. Mit 21 Johr fung he an, as Landschapsmaler ümhertotrecken. He wurr en Schöler vun Camille Roqueplan, de hüm mit Théodore Rousseau, Jules Dupré un anner Malers vun de School vun Barbizon bekannt maken dee.

1846 hett Troyon in Den Haag dat Bild De jung Stier vun Paulus Potter sehn, dat en nahhollen Indruck bi hüm achterleet. In sien Studien vun dit Bild, de Landschapen vun Aelbert Cuyp un de Meesterwarken vun Rembrandt entwickel Troyon en nee Stil un en Können in de Dorstellen vun Deerten, mit de he bald internatschonale Spood harr. He kreeg mehrere Utteknungen un ok Napoléon III. hörr to sien Bewunnerer.

Nah 1850 entstunn up de Ferme Saint-Siméon dicht bi Honfleur en lütt Künstlerkolonie, wo sück Eugène Boudin mit befrüend Maler, as Gustave Courbet, Eugène Isabey, Johan Barthold Jongkind, Claude Monet un eben ok Constant Troyon u. a. drapen un de he to dat Malen in de free Natuur anregen dee.

Sien best Warken entstunnen tüschen 1850 un 1864. Constant Troyon, de nie heiraadt hett, is 1865 in Paris nah en Periood vun geistig Umnachten storven. Sien Moder, de hüm överleevt hett, hett den Troyon-Pries för Deertendorstellen vun de École des Beaux-Arts stift.

To de Schölers vun Troyon tellen ünner annern Emile van Marcke un Gabriel Gervais Chardin. Troyon sien Warken wurrn ok dör grafisch Reproduktschonen bekannt un hemm Infloot harrt up düütsch Deertenmaler as Anton Braith un Christian Mali.

Weblenken ännern

  Kategorie:Constant Troyon. Mehr Biller, Videos oder Audiodateien to’t Thema gifft dat bi Wikimedia Commons.