Curral Velho

Curral Velho (heet so veel as „Ole Hütt“) is en verlaten Oort op dat Eiland Boa Vista in de Republiek Kap Verde.

Dat Ruinendörp Curral Velho vun’n Noorden ut bekeken.

Curral Velho weer en Dörp an de Süüdküst vun Boa Vista, dat man jüst ’n poor Hunnert Meter wiet weg liggt vun’n Atlantik. De Wahnsteed is tostannen kamen, as sik Harders, de in verleden Tieten in dit Rebeet Schaap un Zegen hödd hebbt.

De Ruinen binnen dat ehmolig Dörp.

De Landschap op Boa Vista is to’n groten Deel vun Steenwööst prägt, so dat to’n Boen noog Material dor werr. Se hebbt jemehr Hütten un Hüüs eenfach ut de Steen boot, de ümto rümlegen hebbt. De hebbt se eenfach loos överenanner packt ahn Zement. As de Inwahnertall vun Boa Vista aver bannig torüch gahn is un dat dröge Eiland ok nich jüst goot egent is för de Veehtucht, güng dat mit de Veehhoden een Tiet ok wedder to Enn un de Wahnsteed weer opgeven. De Hüüs staht dor noch, man se verfallt mit de Tiet jümmer mehr, so dat vundaag blots noch ’n Reeg vun Ruinen to sehn sünd.

Strand un Soltpann süüdlich vun Curral Velho

Glieks na’n Süüden to liggt de Atlantikküst mit ehrn feinen Sandstrand un dorvör ein lütte Laguun, woneem vun de See Water insickert. Dat verdunst denn dör de Sünn un lett natürlich enstahn Seesolt torüch. Soltpannen vun disse Oort gifft dat mehrere an de Süüdküst vun Boa Vista. De Tokunft vun Curral Velho is nich ganz kloor. De feine Strand mit sien hellen, fienen Sand weer goot to’n Baden egent un künn dorüm en intressant Teel för Touristen warrn, tomal dat an de Küst ’n beten wieter weg mitünner ok Schildkröten to bekieken gifft, de an’n Strand jemehr Eier leggen doot. Ut de Hööftstadt Sal Rei hett sik nu een dor en Huus wedder opboot, de vör hett, in dat Dörp in de nächsten Johren en Anloopsteed för Strandtouristen to boen. Een groot Problem is dorbi aver man, dat na Curral Velho keen ordige Straat hingahn deit.