Boa Vista (Kap Verde)

Boa Vista (ok in de Schrievwies Boavista) is en Eiland in’n Atlantik. Dat is dat drüttgröttste Eiland vun Kap Verde.

Geografie

Boa Vista liggt in’n Noordoosten vun de Kapverdischen Eilannen twüschen ruchweg 15°58’ un 16°13’ N un 22°40’ un 22°58’. Se warrt to de Ilhas de Barlavento („Eilannen över den Wind“) torekent. De beiden Navereilannen sünd Sal in’n Noorden un Maio, dat teemlich wiet in’n Süüden liggt. Mit en Afstand vun 455 km liggt dat Eiland vun’t gröne Kap an wenigsten wiet weg un is dormit an’n dichsten an’t afrikaansche Fastland. Dat Klima wesselt över’t Johr kuum un de Temperaturen leegt twüschen 20 un 32 °C. Nedderslag is dorbi düchtig roor.

Öörd un Städer

De öllste Oort op dat Eiland: Povoaçao Velha

Ofschoonst Boa Vista en vun de groten Eilannen vun de Republiek is, leeft dor blots bannig wenig Lüüd. In’t Johr 2005 sünd dat ruchweg 5.398 Lüüd wesen^[1], wat noch weniger is, as op dat lütte Eiland Brava, de vun de Flach her blots ungefähr ’n Teihntel vun Boa Vista utmaakt. In’n Dörsnitt leeft dormit op Boa Vista 8,7 Minschen op’n Quadratkilometer.

De gröttste Stadt vun Boa Vista is Sal Rei, se is togliek ok de Hööftstadt. Mit jüst mol 2.122 (2005) is ok Sal Rei keen grote Stadt, man dör den Haven, de dör en vörlaagert Eiland för den Passatwind un dormit ok för gresigen Bülgenslag schuult is, is se vör allen vör den Hanneln von grote Bedüden. Sal Rei schient sik opstunns gau to wanneln, as de Tourismus hier langsom Foot faten deit. Nich wiet weg vun de Hööftstadt liggt wieter na Süüdoosten de Oort Rabil. Veel to kieken gifft dat dor nich, man dör den Flaaghaven Rabil, de in de Nöög twüschen Rabil un Sal Rei liggt, is ok disse Oort ’n beten wat bedüdend. De Flaaghaven is 2007 to en internatschonaalen Flaaghaven utboot worrn un hett den IATA-Kood BVC. Dor den Utbo hofft man op dat Eiland, noch mehr Touristen antehn to künnen, de denn an de feinen Sandstränn an de Küst rund üm dat Eiland baden künnt.

Curral Velho, dat Ruinendörp in’n Süüden

De öllste Wahnsteed vun Boa Vista is Povoaçao Velha, de liggt aver nich an de Küst, man an de Flank vun den Barg Rocha Estância wieter in’t Land rin. De Steed harrn de eersten Siedlers utsocht, wieldat se dor seker weern för de Angrepen vun Piraten. De Oort kann neemlich vun de See her nich sehn warrn. Man dat Leven is nich eenfach, wieldat dat Land so bannig dröög is. Wieter, an de Süüdküst liggt dat ehmolige Dörp Curral Velho, woneem fröher vör allen Veehharders mit jemehr Familien leeft hebbt. Dat Dörp is aver opgeven un vele vun de Hüüs sünd in sik tohopen fallen. Dat gifft aver woll een, de vör hett dor in de kamenden Johren en Steed för Touristen optoboen.

Lüttere Öörd un opgeven und verfallen Dörpers gifft dat noch mehr op dat Eiland. Man en gröttere Wahnsteed gifft dat blots noch een in’n Oosten, neemlich João Galego, Fundo Figueiras un Cabeço dos Tarafes, de so dicht bienanner leegt, dat se meist blots ünner den Begreep Norte tohopenfaat warrt.^[2]

Landschap

Pico Santo António mit sien Basalttipp

De Landschap is prägt dör dat dröge Klima, mit den hitten Passatwind, de kräftig ut Noordoost weiht, den wenigen Nedderslag, de ok al mol een Johr gor nicht kummt un den vulkaanschen Oorsprung vun den Archipel. Boa Vista billt desamen mit de Eilannen Sal un Maio den Oosten vun Kap Verde. Dat sünd de öllsten Eilannen vun de Republiek, de entsprekent ok al an’n meisten erodeert un över wiete Flachen meist even sünd.

De Küst vun Boa Vista wiest rundüm en Keed vun feine helle Sandstränn op, de Kilometer lang sünd. De eensomen Sandstränn warrt faken vun Seeschildkröten opsocht, üm dor jemehr Eier aftoleggen un uttobröden. An de Küsten gifft dat ok eenige langtogende Soltpannen, also natürliche Salinen, woneem dat Soltwater ut’n Atlantik rinsickern deit. Bi’t Verdunsten blifft denn dat utkristalliseerte Solt torüch.

In’t Binnere vun’t Eiland warrt de Kalksockel vun eenige verwedderte Vulkansloten dörbroken. De höchste vun disse Bargen is de Monte Estância mit 387 m, folgt vun den Pico Santo António mit 379 , Tope Vermelho mit 369 m un den Rocha Estância mit 354 m. De Pico Santo António wiest mit an’n düüdlichsten sien vulkaansche Afkunft: De langsom anstiegenden Flanken ut vulkaansch Asch un erodeert Material warrt na baven dörslahn vun de seltsom utsehend schroff un piel opstiegenden Basaltsülen, de in den vörmoligen Vulkansloot verklamt sünd. Süüdlich vun Rabil is ok an een Steed en Schicht vun Flootbasalt opslaten.

Dünen in de Sandwööst de Viana

De restlichen wieten Flachen vun’t Binnenland sünd tomeist wöstenoordig. Grode Delen vun’t Eiland wiest sik as Hammada, also as Steenwööst, wo nix to finnen is as blots Stenen överall. Dörtogen warrt disse Landschap vun flach utlopend Dröögdalen un utdröögte Stroomlööp, de sik blots mol mit Water opfüllt, wenn dat denn doch mol en Schuer geven deit. Man denn kummt dat ok meist gresig dull rünner, so dat dat rietend Water gau gefährlich warrt un ok schon mol de een oder annere Brüch wechrieten kann. An de wenigen Steden, woneem dat Water sik in’n Bodden sammeln kann wasst ok mol en poor Palmbööm un Dattelhainen.

En sünnere Landschap vör sik is aver de Deserto de Viana, wat ne wedder en helle Sandwööst is, de sik as en smalen Striepen dör den Noorden vunt’t Eiland tütt. Se geiht vun süüdlich vun Rabil, vörbi an Estância de Baixo in Richt Noordoosten un sütt kumplett anners ut, as de Rest vun Boa Vista. De Sand mutt woll mit den Passatwind ut de Sahara mit röverdragen woorn wesen över de verleden Johrmillionen. Ut de basaltschen Stenen vun den Vulakanismus kann de neemlich nich tostannen kamen wesen. De Wööst tütt sik as en hellet Band över’t Eiland, dat man ehr sogor op Satellitenbiller goot sehn kann.

Historie

De Monte Estância is de hööchste Barg op Boa Vista

De Naam Boa Vista (port.: „Schöön Ansicht“) hett dat Eiland in’n Striet üm dat Opdecken vun den Archipel kregen. Toeerst beschreven weer dat vun António da Noli, de dat Eiland 1458 na den Schuulhilligen vun de Genueser Seelüüd São Cristovão nöömt harr. De Venezianer Cadamosto bericht in en Nedderschrift vun 1464 en schöne Geschicht, na de de Seelüüd vun’n Storm afdreven weern un sik bi de eerste Ansicht vun dat Eiland 1456 düchtig freihn deen un to’n begröten ropen hebbt „boa vista, boa vista!“ Hinnerk de Seefohrer, in den sien Opdrag beid ünnerwegens weern, leet dat Eiland 1460 dör de Bröder da Noli för Portugaal in Besitt nehmen.

De eerste Besiedeln weer dör Slaven, de as Harders op dat Eiland brocht weern, jüst so as bi Maio. Christoph Kolumbus hett se op sien drüdde Amerikareis 1498 besocht un beschreev en Leprawahnsteed.

Vun 1620 an güng de Solthanneln na baven, de sünners mit engelsche Kapteins afwickelt weer. De Salinen weern vun Slaven bearbeidt un deelwies ok anleggt. Vun wegen dat Problem mit de fakenen Angrepen dör Piraten kemen de eersten Dörper in de Bargrebeden tostannen, de vun de See nich to sehn weern. Sal Rei weer in disse Tiet en goot stahende Stadt un dör den Solthannel ok de bedüdenste vun ganz Kap Verde. Man 1818 weer de Stadt vun Piraten vullstännig tonichten maakt. Dorna weer op’t vörlagerte Eiland Ilhéu de Sal Rei en Fort anleggt, dat mit Kanonen utrüst weer.

Steenwööst (Hammada) bestimmt dat Bild vun’t Binnere vun Boa Vista

1843 neem en engelsch-portugeesch Kommission ehr Arbeit op, de de Slaveree to en End bringen schüll. As Folg vun ehr Arbeit weern de Slaven 1878 all freelaten. De gode Positschoon vun Boa Vista in Kap Verde weer 1845 vörbi, as en gresige Geelfeverepidemie över dat Eiland keem. De Inwahnertall is bit vundaag noch nich wedder so hooch worrn as för de Krankheit, man de Ümstännen op dat Eiland maakt en Leven dor ok swor. Händlers, de Influss harrn hebbt sik vun dat Eiland un vun’t Solt torüch togen un hebbt jemehr Glück in Mindelo as Kohlenhändler nee versocht.

Jöödsch Händlers hebbt in de 1880er Johren vör en lütten Opswung sorgt. So hebbt se en dormols moderne Tegelfabrik boot, de veel Energie bruukt hett, so dat för de Fabrik de ganzen Tamarisken-Strüker opbruukt weern. In wenige Johren bleev dordör de Wööstlandschap torüch, de vundaag so natürlich utsütt.

Rieke Händlers un Kapteins hebbt dorvör sorgt, dat Boa Vista teemlich fröh al vun de Bildung op en teemlich hooch Niveau mit en pan-atlantisch Weltbild keem, so dat dat Eiland influssrieke Künstlers, Musikers, Schriever un Politiker vörbrocht hett.

Weertschap un Tourismus

Siet de 1990er Johren hett sik dat siet de Unafhangigkeit ünner de Dröög liedende un seekende Eiland wannelt un warrt na un na vun de Touristen opdeckt as Attrakschoon to’n Baden. Tomeist italieensch Besökers un Geldgevers hebbt för Opswung sorgt. Jüst ok för Seilers un Surfers is Boa Vista en fein Rebeet vun wegen den sekeren Starkwind. Veehtucht, Fischeree un dat fröher verdreedte Kunsthandwark mit de Keramik speelt en jümmer lüttere Rull. Aver dör den tonehmend Tourismus gifft dat nu wedder mehr Arbeit op dat Eiland, so dat ok de Inwahners wedder mehr warrt.

De kilometerlangen fein-hellen Sandstränn un romantischen felsigen Küstenrebeden sünd opstunns noch fast ahn Minschen, nich opletzt ok, wieldat de Weg na den Süüden ahn gode Straten teemlich swoor is. Mehr Toloop warrt dat eerst geven, wenn de internatschonale Flaaghaven Rabil sien Wirken wiest un noch mehr Touristen Boa Vista besöökt. Utfohrten un Wannern in’t Binnere vun’t Eiland geevt en beten Afwesseln to’n Watersport un to’n Liggen an’n Strand.

Borns

↑ Natschonal Institut för Statistik
↑ Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0

Weblenken

Tourismus-Websteed Boavista Official

Eilannen vun Kap Verde

Koordinaten:16° 6′ N, 22° 48′ W

[1] Natschonal Institut för Statistik

[2] Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0

[1]

[2]